Law & Judicial Department buatsaihin vawiin khan Mizoram Sorkar Department zawng zawnga Legal Matters Nodal Officer te, Government Advocate/Public Prosecutor te leh District tina DC (emaw a aiawhte) kokhawmin Sorkar Department ten Court Case emaw anmahni kaihhnawih Legal Matter reng rengah an hmalak/bawhzui dan tur leh an tih turte hrilhfiahna hun hman an ni a. He ‘Seminar on Court Cases/Legal Matters for Nodal Offciers, Govt. Advocates under Mizoram Government’ hi Assembly House Annexe Conference Hall, Aizawl-ah neih a ni.

Court Case Seminar Pu Zahmingthanga Ralte, Jt. Secretary, Law & Judicial Department kaihhruaiah Law & Judicial Department Secretary Pi Marli Vankung chuan sorkar department thenkhatin court case an neihte an bawhzui chak tawk loh avangin Mizoram sorkarah ‘contempt of court petition’ a lut thin a, hemi sutkian nan Mizoram Chief Secretary hova Secretaries’ meeting an neihah Sorkar Department tina Legal Matters Nodal Officer te, Govt. Advocate te leh DC te kokhawmin court case bawhzui dan tur te, legal record vawn dan tur te leh dan lampang thil pawimawh an hriattur hrang hrang inhrilhfiahna hun hman nise tih a nih angin vawiin Seminar hi a hmasa ber atan buatsaih a nih thu a sawi. Sorkar hnathawkte chu transfer & posting avangin an awmna hmun leh department ngai rengah an awm theih lova, chuvangin a khat tawka legal training/seminar buatsaih hi a pawimawh hle a ni, a ti. Pi Marli chuan Department-in Court Case an nei a nih chuan nakina ngaihtuah atan dah tha/dah bo mai lovin, bawhzui nghal thin nise, hemi atan Govt Advocate-te pawh rawn thin nise tih a sawi a; Department lamin an ngaihthah thin avangin Court-ah ‘para-wise comments’ thehluh tur pawh an tlai phah thin a, Court lamin vawi 3 bak an sawn (adjourn) sak theih loh avangin ‘Contempt of Court Petition’ hi sorkarin in a dawng leh phah thin a ni, a ti bawk.

Vawiin Seminar on Court Cases-ah hian a hnuaia mithiamten thupui hrang hrang hmangin zirtirna an pe a ni :
1). Pu C.Zoramchhana, Addl. AG. Gauhati High Court, Aizawl bench
2). Pu Joseph Lalfakawma, GA/PP, District Court, Aizawl
3). Pi Melody Lalrochampuii Pachuau, Dy. Secretary, law & Judicial Dept.
4). Pu Vincent Lalrokima, Dy. Secreatry, Law & Judicial Dept.