Mizoram sorkar chuan Tuipuiral Zirlai Pawl in July 26, 2012 a Aizawl a Press Conference an neih tuma Tuipuiral Area chhunga school zirtirtu indaihlohna a nasat thu an sawi leh an President thusawi copy Education Minister zahawm tak hnena an pek alo bawhzui dan a thlirlet a. Khatih lai kha Mizoram Assembly Budget Session neih lai a ni chungin Official lam chuan Tuipuiral Area a School hrang hrangte dinhmun leh school harsa zual an awm leh awm loh te enchiangin atul ang a thuam tha turin hma a la nghal a.Tichuan Mizoram Assembly Budget Session zawh veleh Minister hova thukhawmin hetiang hian ruahmanna an siam a ni.

Primary School bikah hian (1) Khuangleng P/S; (2) K.M. P/S Khuangleng; (3) Lianpui P/S; (4) Sesih P/S ; (5) Vangchhia P/S leh (6) Thekte P/S ah te hian Special Trainer SSA atangin pek belh mek an ni a.

High School leh Middle school dinhmun pawh uluk takin a ngaih tuah a. Middle School bikah hi chuan zirtirtu leh zirlai Ratio en in dah belh tulna a awm rih lo niin a lang a. High School ah hian Govt.Khawbung H/S ah zirtirtu 6 awmna turah 3 an awm mek a. Hei hi RMSA atangin thu leh awm hma chu thuam tum mek a ni a. Govt. Vanzau H/S ah hian zirlai 18 an awm mek a, zirtirtu 3 hmeichhia vek an awm a, RMSA atanga thuam tum mek a ni. Govt. Khuangleng H/S; Govt. Bungzung H/S; Govt. Chhaktiang H/S, Vaphai; Govt. Samthang H/S leh Govt.Thanchhuma H/S, Farkawn ah te hi chuan dah belhloh pawhin fahrah lo tak dinhmunah an dingin a lang.

Mizoram sorkar chuan sorkar hmalaknate hrilhfiahin Tuipuiral Zirlai Pawl te chu naupang zirlai leh nu leh pate tana harsatna siam lo tur leh school khar lo turin ngenna lehkha pawh a pe tawh a. Tuipuiral Zirlai Pawlte chu an thiltum thulh turin sorkar chuan a ngen nawn leh a ni.