3574/2024-2025

Aizawl, December ni 17, 2024 : Vawiin chawhma Dar 10:30 khan Social Audit Unit (S.A.U.), Mizoram buatsaihin Secretariat Conference Hall-II, MINECO-ah MGNREGS hnuaia 10th December, 2024-a Mizorama khaw 301-a social audit neih zawh tak Review Meeting neih a ni.

He review meeting hi S.A.U. Director, Pi C. Laltleipuii chuan a kaihruai a. District tin District Rural Development Officer (DRDO) leh Rural Development Block hrang hrang 18 atangin Block Development Officers-te, Assistant Rural Development Officer, Additional Programme Officer-te leh officials dangte an kal khawm a ni. Chairman chuan kalkhawmte lawmna thu sawiin, social audit pawimawhna leh neih a tul chhan te leh, Social Audit-in a tum ber chu he scheme hnuaia hnathawh tur hrang hrang Sawrkarin a duan te chu a scheme-in a tum ang taka dik leh felfai taka thawh a ni reng em tih leh engtiang takin nge mipuiin an chhawr tangkai tih a hmun ngeia endik a, thil felhlel awm ang ang te a tul anga siamthaa, bawhzui ngaite bawhzui zel a nih thu a sawi. 

He meeting-ah hian Mizoram chhunga November ni 25 – December ni 10, 2024 chhunga MGNREGS hnathawh endikna (social audit) neih zawh taka hmuhchhuah hrang hrangte sawihona neih a ni a. Resource Person-te report atangin District leh Block hrang hranga hma lak chhunzawm turte leh bawhzui ngai, siamthat ngai tul leh pawimawh tak tak awmte chu bawhzui zel dan tur sawiho a ni bawk.