3575/2024-2025

Aizawl, the 17th December 2024: Nimin khan Department of Information & Communication Technology Minister Dr Vanlalthlana hovin Directorate of ICT Conference Hall-ah review meeting neih a ni a, ICT Secretariat leh Directorate-a officer-te an tel.

Meeting hi Minister Dr Vanlalthlana'n a kaihruai a. Pu Vanlalringa, Senior Informatics Officer chuan Department of ICT hmalakna hrang hrang leh hmachhawp hrang hrangte sawi fiahin powerpoint presentation a nei a, sawi hona hmanga chhunzawm a ni.

Minister chuan sawrkar ṭha (good governance) neih nan chuan khua leh tui thil hria (informed citizen) siam a ngaih thu te, chumi tura IT hmanga sawrkarin hmalakna hrang hrang a neih a ṭul thu leh, chu chu tihlawhtling tur chuan ICT Department chu sawrkar kut-ke ber a nih thu a sawi a. ICT inrawlhna tel lo chuan sawrkar chak siam a har tawh a, Mizoram sawrkar hnuaia department hrang hrangte phuar khawmtu leh sawrkar leh mipui thlung zawmtu ber chu ICT department a nih thu a sawi.

Sawi honaah hian ICT-in project an enkawl mek chak zawka kalpui dan tur te, ICT-in hmachhawp an neih bawh zui dan tur leh, kum thara ICT hma lak theihna tur ruahmanna siam dan turte sawi ho a ni.