3576/2024-2025

Champhai, 17th December 2024: Vawiin khan Champhai DC Conference Hall-ah District Consultative Committee, District Level Review Committee leh District Level Security Committee chu Bawrhsap Pu VL Remliana kaihhruaiin an thu khawm a. Kum 2024 July – September Quarter chhunga Champhai District-a Bank hrang hrang te hmalakna an thlir let a ni.

Champhai Bawrhsap Pu VL Remliana chuan kalkhawmte lawmna thu sawiin,NABARD Regional Office-ten Champhai District tan a an  buatsaih Potential Linked Credit Plan, (PLP) 2025-26 chu a tlangzarh a. He PLP hnuaiah hian loneitute hmasawnna atan te, hmasawnna ruhrel dinna atan te, Micro Small & Medium Enterprise te tihchakna turin cheng nuai 26129.69 ruahman a ni.

He hunah Pu Lawmkima, Lead District Manager(Convenor) chuan meeting agenda sawi hawnna aneih hnuah  Champhai District chhunga Bank ten mipuite tana hlawk zawk leh tangkai zawka hna an thawh theih dan tur te sawiho a ni a. Quarter liam ta (July– September 2024) chhunga Bank hrang hrang te chet dan pawh thlirho niin, District chhunga Bank zawng zawng te CD Ratio (Bank-in pawisa deposit an hmuh atanga pawisa an puk chhuah tir zat) chawhrual chu za zela 68.50% a ni tih tarlan a ni a. He hun chhungah vek hian mipuite tan tum 36 zet ‘Financial Literacy Campaign’ neih a ni tih tarlan a ni bawk.

Thutkhawma tarlan danin Champhai District chhunga Bank-te hian Prime Minister Employment Generation Programme (PMEGP) hnuaiah loan 10, cheng nuai 35.12 an pe chhuak tawh a. Pradhan Mantri Mudra Yojana hnuaiah account nei mi 592 awmin, he scheme hnuaiah hian loan cheng nuai 1085.63 pek chhuah tawh a ni. Housing Segment-ah loan cheng nuai 345 pek chhuah tawh a ni bawk. Social Security Scheme hrang hrang - Pradhan Mantri Jeevan Jyoti Bima Yojana (PMJJBY) hnuaiah mi 1746, Pradhan Mantri Suraksha Bima Yojana (PMSBY) hnuaiah mi 2237, Atal Pension Yojana (APY) hnuaiah mi 367 leh Sukanya Samriddhi Account (SSA) hnuaiah mi 5 te an inziaklut tawh bawk a ni.

Vawiinah hian thutkhawm danga rel tawh thin - Bank venhimna kaihhnawih leh District chhunga sum chet vel dan te pawh sawiho a ni.