Vawiin khan Government Hnahthial College chuan Freshers' Social & Graduation Day 2016 chu Government Hnahthial College Auditorioum-ah an hmang a, Parliamentary Secretary Pu Joseph Lalhimpuia' n a hmanpui.

Pu Joseph Lalhimpuia chuan thu sawiin, Formal Education kum 124 dawn kan neih a kan kalpui tawh a, tih tur leh thawh tur erawh kan la ngah hle a ni, a ti a. Tunhnaiah Education Reforms Commission rawtna zulzuiin Class VI chin chunglamah Medium of Instruction atan English hman tur a ni tih order chhuah a ni a, Technology chhuak thar zel mila zirlaiten thiamna an neih theih nan leh, khawvel zau zawk thlirin English mamawhna a sang zel a, Group of Expert-te pawhin bawhzui tura an dah a lo ni bawk nen, Sorkar School leh miretheite hmasawnna atan zirtirna pekna atan English hman chu ngaih pawimawh a nih tak thu a sawi a. English hman anih dawn tak avangin Mizo tawng hlamchhiah a ni dawn chuan loh thu a sawi a. Grammar-te leh tawng dik zawk thangtharten an thiam zel theih nan Mizo Subject hi tha lehzual zawkin kalpui a nih zawk tur thu Parliamentary Secretary chuan a ti bawk.

Pu Joseph Lalhimpuia chuan Education Department hmalakna dangte tarlangin, kumina District Capital-ah Model School din a, hengte hi Private School ai pawha thaa enkawl leh dawm chhoh Sorkarin a tum thu te; hun rei tak neih anih tawh loh hnua School Permission pektheihna Dan siam a nih thu te; School hrang hranga Subject Teacher kan neih mumal loh chu Recruitment Rules siam tha in Middle School-ah Subject Teacher lak an nih thu te leh; High School-ah pawh Recruitment Rules siam that a nih hnuah tuna ennawn ngaite en that leh mek a, tihfel a nih veleh High School zirtirtu 100 chuang la turin Department chu a inbuatsaih mek thu a sawi a. Mizoram Hostel Rules siam a nih tawh thu leh, He Rules ang hian tuna Hostel dinglaite pawh kum 2 chhung chance pek an ni ang a, Rules anga Hostel mamawh an neih theih loh chuan kharsak an nih tur thu a sawi a. High School-a New Evaluation Scheme siam thar chu a tirah huphurh hle mah ila, zirlaite-ah a hlawhtlinna a lang chho tan a, Class test leh Attendance zirlaiten an ngaih pawimawh phah a, zirlaite an tang ta hle a ni, a ti bawk.

Pu Joseph Lalhimpuia chuan khawvel hi inelna khawvel a ni tawh a, tun kum 2 chhung hian School Education Department-ah zirtirtu 200 chuang MPSC kaltlangin kan la a, tumah intihpui theih a ni tawh loa ni, a ti a. MPSC-ah chuan a thiam thiam an tling mai a, chuvangin College zirlaite chu hlawhtling tura zir turin a chah a, zirlai passed tharte hnenah lawmpuina thuziak a hlan bawk a, tin, Hnahthial College tan Geography post pahnih (2) process mek a nih thu a sawi bawk.

He hunah hian Pu Lalzirmawia Chhangte, Addl. Secretary pawhin thu sawiin, College zirlaite chu mi hlawhtling ni tura thawkrim turin a fuih a. Zirtirtute pawh UGC duhdan anga tunlai khawvel mila thil thar leh ngaihdan thar hrethiama intuaithar taima turin a fuih bawk a. Hnahthial chu tunhma zirna hmunpui a lo nih tawhna chhawm nung zela mi hlawhtling tak tak te chhuahna ni zui zel tura a duh thu a sawi a ni.

Hnahthial Government College-ah hian Teaching leh Non-Teaching Faculty 37 an awm a, zirlai 126 an awm mek a, a din tirh atangin BA passed chhuak tawh 328 an awm a, kumin Result chhuakah khan Candidate appeared 28-ah 13 an passed a ni.