Vawiin chhun khan Chief Minister Pu Lal Thanhawla hovin a office Cabinet Room-ah High Level Meeting on Financial Resources chungchangah neih a ni a. He meeting-ah hian Mizoram sorkar sum dinhmun chu zir chiangin, sum awm angte daihzai thei ang bera hman anih theih dan tur an sawiho.

Chief Minister chuan sum harsat chungchanga kan insawi thaih thin hian mipuite rilru ah sum inrenchem pawimawhna a siam a, a lawmawm hle a ni a ti a.Sum harsatna chu sorkar hian a nei ngei a, amaherawhchu kan sawi ang em em hi chu a nilo tiin, a tulna a zirin hman tur chu a awm reng a ni a ti.

He meeting-ah hian NITI Aayog in state tinte sum hmuh dan kalphung a thlak danglam avang leh 14th Fianance Commissionin sum kan hmuh tur a bituk chungchangte bakah State sawrkarin sum a hmuh dan tur meeting hian a zir chiang a. Finance Minister Pu Lalsawta hmalaknain sorkarin leiba a neih te pawh nasa taka a tih tlem tawh thu meetingah hian sawilan niin, K-Deposit lamah pawh harsatna a tlem tawh thu tarlan a ni. State dang te nen a tehkhin phei chuan Mizoram dinhmun chu a tha ber zing ami a ni tih sawilan a ni bawk.

Meeting hian sorkarin sum a neih te chu a tha thei ang bera invest a tul thu an sawi a. Kuthnathawktute thar chhuah tipung tur leh hlawkna tel tura sawrkar leh mimal thawh ho theih dan tur an thlir nghal a. Mizorama thlai thar tam zawkte hi a tona chhan ber chu a thar chhuah nana sum sen a san vang a ni tiin, link road laih hnem a pawimawh hle a ni an ti a. Kan thil thar chhuahte chu ram pawna thawn chhuah tham ni turin buaipui bik tur thlan thiam a ngaih thu an sawi tel bawk a ni.