Vawiin chawhnu khan Mizoram State Disaster Management Authority (SDMA) chu an Chairman Pu Lal Thanhawla, Chief Minister kaihhruaiin a office cabinet room-ah an thukhawm.

Chief Minister chuan kum 2016 Thawhtanni hmasa ber, January ni 4 zing kara lirnghing khan Mizoram mipui a barakhaih hle a, seismic zone-V a awm Mizoram hian lirnghing rapthlak tawng thei reng dinhmuna a din laia tun thlenga kan la tawng lo hi Pathian humhimna a ni, a ti a. Hetih lai hian lirnghing nasa tak lo thleng ta se Aizawl khawpui chep tak, inhnaih te te a insakna, khawpui plan mumal nei lova awmte hian eng tin nge kan lo inven ve theih ang tih leh sawrkar leh mipuiin engtin nge kan lo hmachhawn ang tih ngaihtuah a tul tak zet a ni, a ti.

Mithiamten an lo zirchian tawh danin Aizawl khawpuiah hian richter scale 7 velin lirnghing ta se hun reilote chhungin chenna in tam tak a chhia ang a, second 30 vel lek chhungin mi sing chuang zetin nunna an chan thei dawn niin an chhut a. Chuvangin lirnghing lo thleng ta se mipui ten enge kan tih theih tih hi inzirtirna uar leh zuala kalpui a tul niin meeting chuan a hria a. Lirnghing laka kan him zawkna atana kan tih leh tih loh tur inzirtirna lehkhaziak chu Mizoram chhunga in tinah sem ni se an ti.

Rapid Visual Screening hmangin PWD a Hazard Safety Cell chuan sawrkar building hrang hrang te hi lirnghing thulha an dinhmun hlauhawm dan tura zirin grade I atanga grade V thleng an thliar hrang tawh a. Meeting chuan UD&PA leh AMC nena thawk hovin heng building hlauhawm zualte siam that hna hi Aizawl Smart City Plan kaltlanga thawh dan zawn tha a ti. Building insurance chungchang sawiin sawrkar leh mimalin nuai tam tak senga concrete building tha tak tak an sak te hi khuarel chhiatna lo thlengin tichhe ta se, hmuh let leh tur sum awm lova a ral vek dawn avangin insurance lamah mipui har thar a ngai hle niin SDMA chuan a hria a. Hun remchang hmasa ah veng tina Local Council leh khaw hrang hranga Village Council member-te kokhawmin hemi chungchang hi inhrilhfiah nise an ti. 14th Finance Commission recommend anga Centrally Sponsored Scheme (CSS) nei department ten chhiatna a lo thlen thulha an department theuh ten an hman tang kai theih tur kum tina an sum hmuh atanga 10% dah hran pawh meeting-ah hian tarlan niin bawhzui tha an ti bawk.

Hei bakah hian State leh District Disaster Management Plan chunghcang te, chhiatna a lo thlena sawrkar leh private hospital-te mawhphurhna te, Fire & Emergency Service, State Disaster Response Force, sawrkar office leh mipui mawhphurhnate bakah leimin tam tak siamtu in hmun laih inkhuahkhirhna dan siam mek chungchang pawh meeting-ah hian tarlan a ni.

SDMA meeting ah hian Home Minister Pu R.Lalzirliana, LAD Minister Pu PC Lalthanliana, Chief Secretary Pu Lalmalsawma, DM&R Principal Secretary Pu C.Lawmsanga leh DM&R official te bakah Disaster Management Expert Pu Dominic Lalhmangaiha te an tel a ni.