Chief Minister Pu Lal Thanhawla chuan sorkarin school provincialise a tum tawhlo a ti. He thu hi vawiina Tlungvel khawtlangina an din, Tlungvel Higher Secondary School building sak thar a hawnna a a sawi a ni.

Chief Minister chuan khawtlangin an mamawh nia an hriat avanga school an din thin chu sorkarin tha a tiin, a zah a, chuvangin din phalna permission te pein, grant-in-Aid ah te a dah a, mahse a aia sanga daha provincialise turin an nawr a, Sorkarin sum harsatna a tawh hrechang duh lovin khar hial an tumte hi a pawi hle a, sorkar chuan tihngaihna a hre tawhlo a ni a ti. Sorkarin sum nei se dil buai ngai lovin an duh ang chu a tihsak daih tawh ang a ti. School khar avang hian zirlai naupang ten an tawrh theih avangin, harsatna tawklo turin Education Ministerin ruahmanna a siam mek a ni a ti.

Chief Minister chuan heng school khawtlang dinte hi tha taka an kal chhoh zel theihna turin aided ang ten kalpui a tum a ni a ti a, provincialised erawh a tum tawhlo a ni a ti. School engemawzah Board exama result nil te chu sorkar chhawdawlna an hmu zel dawn em tih chu departmentin a ngaihtuah mek a ni tiin, a ti tha te erawhchu chawisan zel an ni ang a ti.Chief Minister chuan hmasawnna lokalte hi khawpui tawt tawh taka beng zel loin, Mizoram khua remchanna zelah semzaia kal chohpui tum a ni a ti.

Khualzahawm Tuikum bialtu MLA Pu K.Lianzuala, Chairman KVI Board chuan sorkar hi kan nu leh pa a ni teh meuh a, mahse kan dil zawng zawng hi a pe vek thei fo lo a ni a ti a. Hmasawnna kal chho zelah Tlungvel mipuite chu hmathlir thiam tak nei turin a chah a ni.

Tlungvel Higher Secondary School hi kum 2010 May ni 4 khan khawtlangin an din a, bul tan nan bialtu MLA hian Rs.1 lakh in tanpuina a pe a. Tuna a building hi khawtlang thawhkhawm atangin ni 25 June 2012 khan sak tan a ni a, Rs 12 lakhs chuang an seng a ni. Class room building ringawt hi 72ft asei leh 18ft avang a ni a, office hi 30ft leh 18ft a zau a ni bawk. Mipa leh hmeichhia zirlai naupangte tan inthiarna a hrang ve ve in siam a ni bawk. Thawktu, zirtirtu leh office staff tiamin 8 an awm mek a, kuminah zirlai 46 an awm a, Tlungvel leh a chhevel khua atangte a kal an ni. Board exam result an nei tha thin hle a, passed percentage 86% atanga 100% te an nei thin a ni. A school hmun zawng zawng zau lam hi 5839 sqmetres a ni.

Hawnna inkhawm hi Schoolah neih a ni a, Pu V.Lalmuana, VCP & Chairman, Managing Board in a kaihruai a ni. Chief Minister hi Pu R.Selthuama,MLA & Chairman, NLUP Implementing Boardin a tawiawm a ni.