MFA President, Minister of State Pu Lal Thanzara chuan Mizo thalaite khawvel thlira sorkarin infiamna hmunhma leh hmanrua a ngaihtuahsak te hi a hmangtu infiammi leh mipui mimirte hian neitu rilru pua dimdawi leh uluk taka enkawlzui kan thiam a pawimawh takzet a ni, a ti.

He thu hi vawiina a office-a MFA Executive Meeting a kaihhruainaa a sawi a ni. Vawiina MFA Executive meeting-ah hian report hrang hrang MFA Cup-2014, MPL-2, Tournament thlenna sum, AFCD Licensed Instructor, AIFF Head of Referees Course leh Centralised Registration System chungchang ngaihthlak a ni a. An thurel langsar zual deuh deuhte zingah May ni 13 a German football thiam, Bundesliga club Hoffenheim mikhual dan tur leh Kashmir Invitation Cup 2014, WIFA -in Santosh Trophy Team a lawmpuina tur te a tel a. MPL-2, Santosh Trophy leh Dr. T Ao Tournament khelh zawh tak te an thlir let bawk.