Vawiin khan UN Technical Mission team zinga mi Dr Peter Kenmore leh Dr AB Negi hovin Central Agriculture University Conference Hall-ah vawk hri (PRRS) tihrem dan tur ngaihtuahin meeting pawimawh tak neih a ni a. State Planning Board Member & Secretary, Pu P.L.Thanga, NLUP Implementing Board Vice Chairman & CEO ni bawk leh College of Veterinary Sciences & Animal Husbandary, Selesih-a Dean, Prof. D. Kathiresan bakah AH&Vety Director Dr LB Sailo, Vety College a mithiamte leh AH&Vety Officer-te he meeting-ah hian an tel.

AH&Vety College lam mithiamten hun engemaw chen PRRS (Porcine reproductive and respiratory syndrome) chungchang zirbingna an lo kalpui tawh atangin an hmuh dan leh a do rem theih dan tur kawng nia an hriatte meeting-ah powerpoint hmangin an entir a. AH&Vety lam pawhin Mizoram hmun hrang hranga he PRRS avanga harsatna lo thleng tawh a hmun ngeia an enkawl dan atanga ngaihdan an neih te ngaihthlak a ni bawk. PRRS hi natna tharlam tak, virus natna hrik in a thlen, ram dang atanga rawn lut a ni a. He natna hian vawkpui bikah note chhiatna a thlen a, vawk dangah erawh chuan thaw hah leh khawsik sang tak thlenin chu chu vawk tam tak thihna thlentu a ni. Mizoramah hian kum 2013 June thla vel khan he natna hi a lo lut ngei tih finfiah a ni.

Pu PL Thanga chuan vawk vulhtute tana harsatna thlen thin tu PRRS nuaibo dan ngaihtuaha thukhawm scientist leh mithiam rualte, FAO aiawhte leh AH&Vety lam hotute hian a chinfel dan tur kawng thar an hmuhchhuahpui ngei a beisei thu a sawi. UN Mission Project hnuaia Mizoram tana hmalakna tur duan mek hi India ramah a hmasa ber tur niin Technical Mission Team te hian he natna tharlam PRRS tih rem hi an ngaihpawimawh ber te zinga mi a ni.