Mizoram tan UN Mission project buaipui tura lo kal UN Technical Mission Team te chuan vawiin khan hmun hrang hrang pali -NLUP Conference Hall, Central Agriculture University Selesih, Principal Secretary, Labour & Employment office, Secretariat complex ah leh Engineer-in-Chief, PWD office ah te department pawimawh te nen hmalakna tura ngaih pawimawh bik area te an sawi ho.

NLUP conference hall-ah chuan zing dar 9:30 am atanga tanin Pu L.R.Thanga Principal Secretary, Agriculture, Horticulture, E&F etc. kaihhruaina hnuaiah UN Agency 4 UNDP, UNIDO, ILO leh FAO aiawh te leh heng department - Agriculture, Horticulture, Fishery, Environment & Forest, Sericulture, Soil & Water Conservation, Industries, leh Trade & Commerce hotu ten sawihona an nei a. Department tinin mahni hmalakna tlangpui tarlangin Mizoram leilung atanga kumtin thar chhuah zat leh heta tanga Mizoramin sum a lakluh dan te, central sorkar hnuaia scheme kalpui mek te, Mizoram in area hrang hranga potential a neih that dan te, hnathawktute thiamna tihpun a tulna lai te, thar chhuah hlutna tipung tura a sawngbawlna kalpui dan tur te, thar chhuah hralhna kawnga harsatna tawh mek te, chipchiar takin sawiho a ni a.

Chawhnu ah Pu P.C.Lallawmsanga, Principal Secretary, Labour & Employment etc. hovin a office ah ILO, UNDP leh UNIDO aiawh te leh heng department - Labour & Employment, Rural Development, Social Welfare, Industries te leh Youth Commission leh Hnam Chhantu ten sawihona an nei ve thung a. World Bank kawng enkawl zuina tur chungchangah tlai dar 4 khan Engineer-in-Chief PWD office ah PWD hotute leh ILO aiawh ten hmalakna tur sawihona hi an nei bawk a ni.

UN Technical Mission team te hian vawiin tlai ah Chief Minister Pu Lal Thanhawla chu Chief Minister’s Bungalow ah an hmu ang a. Naktuk May ni 7 chawhma lamah pawl hrang hrang, kut hnathawktu pawl hrang hrang, ZOHANDCO, ZOHANFED, CDAR, MULCO, MAMCO, Hnam Chhantu te leh chawhnu lamah pawl hrang hrang, CYMA, MHIP, MUP, Mizoram Chamber of Industries leh Mizoram Chamber of Commerce te nen meeting an nei zui ang a. May ni 8 atangin district hrang hrang an tlawh ang a, May 12 hian UN Mizoram Mission Project atana rawtna an siam dawn a ni.