Vawiin chawhma khan State Emergency operation Centre, Chawnpui ah National Disaster Management Authority Member Pu K.M. Singh, North East States leh Sikkim te enkawltu chuan State Disaster Management Authority(SDMA) member te kawm in an hmalakna te a endik a. He meeting DM&R Principal Secretary Pu P.C. Lallawmsanga kaihhruai ah hian SDMA thuneitute chuan State in chhiatrupna lo thleng thei awmze nei leh sawt zawka a lo hmachhawn theihna tura a inpuah chahna te sawiin an mamawh hrang hrang te NDMA member hi an lo hrilh a ni.

Pu K.M. Singh, NDMA member chuan Chhiatrupna lo thleng thei hmachhawnna kawnga Mizoram hmalakna ah te chuan tumruhna leh hmasawn tumna tam tak hmuhtur a awm a, hei hi thil lawmawm tak a ni a ti a. Hmanrua leh chhanchhuahna hnathawktute pawh a remchan dan anga pek pelh an mamawh thu a sawi a. Heng kawnga Mizoram Sum mamawhte pawh State lenzawng leh mihring tam dan anga pek nilovin a mamawh dan ang zawka pek a nih theih nan 14 Finance Commission a hmuh hunah a lo sawi chhuah tur thu a sawi a ni. Mizoram State Disaster Management Plan chu ruahmanna tha tak a nih rual in mipui ten an la hrechiang lo hle a, chak zawka awareness campaign nei tur te leh mock drill te pawh Aizawl ah chauh nilovin Mizoram hmun hrang hrangah tun aia nasa zawka kalpui zel turin SDMA thuneitute chu a hrilh a ni. Chhiatrupna lo thleng thei hmachhawnna leh kalpui dan tur ruahmanna lehkhabu ngat phei chu Library leh thingrem chhungah te a awm mai mai chi a ni lo tiin inzirtirna tam zawka kalpui a pawimawh thu a sawi a. Accident lian tham emaw chhiatrupna pawh lo thleng palh se chhanchhuahna hnathawktute rang taka koh nghal theih a nih loh chuan nunna tamtak kan hloh thei a. State disaster response team te phei chu darkar 24 chhunga in ring renga an awm a ngai a, Election Duty ah hial te pawh thuneituten awl thei se a that ber tur thu a sawi a ni.

SDMA meeting ah hian District hrang hranga Emergency Operation Centre(EOC) te dinhmun leh tihchangtlun a tulna te sawichhuah a ni a. Incident response system(IRS) mechanism - chhiatrupna lo thleng ta pawh nise a nih phung a zira chhanchhuah hna kalpui dan te bakah chhanchhuahna bungrua, inbiak pawhna leh damdawiin a hmanhrua leh mamawh awm ngei ngei tur chungchang te tarlan a ni a. State hmalakna te hi theihtawpin NDMA chuan a puih tur thu leh hmanrua an mamawhte pawh a tul anga an pek tur thu MEETING ah hian NDMA hotute chuan an sawi a ni.

March 13 a Aizawl leh serchhip khawpuite a neih tak Mega Mock Excercise chu a hlawhtling hle in NDMA chuan a ngai a. Department hrang hrang te nena thawhhona tha a awm theihnan thla 3 chhunga vawikhat tal dawhkan kila ruahmanna leh sawihona neih thin ni se, Mega mock Drill pawh state sawrkarin a hun ruat tawh se a tha ang an ti a. Meeting pawimawh ah member te nilova an aiawh an kaltir fo thin chu thil thalo tak leh meeting a thil rel tak te a sawt thin lohna pakhat a ni a. Disaster management chungchangah kher chuan meeting a kal tur a kohte chu kal ngei ngei tawh se hmalak pawh a chak sawt dawn ni in NDMA member Pu K.M.Singh chuan a sawi a ni.