Vawiin khan School Education Minister Pu Lalchhandama Ralte chuan Durtlang Higher Secondary School-ah Durtlang Teacher Association General Meeting a hmanpui. Zirtirtute hmaa thu a sawiah Minister chuan sorkarin zirna a ngai pawimawh a, zirna hi a thuam tha dawn, a thikthu pawh a chhia ang a ti.

Minister chuan tun kum sorkar school HSLC result-a Nil te chu explanation call nghal turin a hriattir tih sawiin school tichhe rei tawh te phei chu school khar anih lohna chhan tur zawt turin a hriattir tih a sawi. Zirtirtu kalkhawmte hmaah sorkarin zirna a enkawl dan sawiin Minister chuan Sorkar school-ah a thlawnin admission a tih theih a, Uniform leh textbook te, mid-day meal te a thlawn veka pek anih bakah school building tha zawk, zirtirtu pawh qualified tha tak tak kan nei a, facility pawh a theih ang ang kan inpe, tun dinhmunah chuan hlawh pawh ba lovin kan inpe. Chuti chung chuan naupangin private school an pan zawk tlat a,  a chhan pawimawh takah hian zirtirtute kan tel ka ring tlat a, zirtirtute kan inenfiah ka duh hle a ni a ti. Minister chuan kan ram economy-ah kan sang lo, chuti chungin nu leh pate zirnaah kan rualawt a, nei leh nei lovin kan insengso ngam a,  sorkar  chuan naupangin zirna tha an dawn theih nana an mamawh chhawp chhuah chu kan tih tur a ni a, duhthusam nilo mahse, a theih ang angin school mamawh kan inpe a, chuti chung chuan engatinge naupang kan neih tlem tiin a zawt a.  Kum 2020 admission lak anih leh dawn hunah chuan engtinnge naupang tam zawk kan hmuh theih ang tih ngaihtuah turin a sawm a ni.

Minister chuan Kan society chhe zelah hian zirtirtuten mawh kan phur lian a, naupangte nundan tha zirtir an ngai kan tih laiin chutiang zirtir tur pawh sorkar sikulah kan nei tlem ta lutuk a. Sumdawnnaa kal school-ah (an tha lo tihna ni lovin) naupang moral siam thatna tak tak aiin byheart systema kal zirtirnaah naupang an kal hnem ta lutuk a, aia upa zahna kan tih te, Mizo society nunphung pangngai te a tlahniam ta zel a ni a ti. Khawtlang nun siamthatnaah hian zirtirtute kan pawimawh a, kan pawimawhna tihlawhtling tur chuan mi tam zawk kan hip khawm a tul, chumi tur chuan zirtirtute i inbuatsaih ang u tiin a sawm a ni.     

Minister chuan aikal la, hrisel lohna avang te, khawtlang pawhin hriatthiam loh theih lohte an awm laiin dam tha si, mahni hnathawhna hmunah pawh awm tha lo sumdawng ta lawp lawp te an awm tiin Tlawm te tea aikal chhawr trained mang hleih loh chhawr an tam a, kan theih chin chinah hei hi khauh takin kan en fel dawn a ni a ti.

Minister chuan zirtirtute chu an hnathawh theuhah Pathianin a kohna hmun a ni tih hriaa, Missionary field-ah hmanga sorkarin a beisei anga tan hun leh ban hun ngai pawimawh a, discipline tha taka vawng a, mite entawntlak zirtirtu ni turin a sawm a ni.

He hunah hian School Education Department-a Additional Director Pu K.Laldingliana leh RMSA DySPD Pu C.Chawngthantluanga te pawhin thu an sawi a. Pu K.Laldingliana chuan zirtirtuten an zirtir danah tun hma aia danglamna lantir a pawimawh ta a ni a ti a. Tun hnaiah School Education Department hman tur Bolero 10 lei thar a ni a, hengte hi SDEO ten inspection atan an hmang dawn a ni tih a sawi a. Sorkar beiseina tihlawhtlingtu ni turin zirtirtute chu a sawm a ni.

Durtlang Teacher Association General Meeting-ah hian Durtlang huamchhunga school hrang hrang Primary atanga Higher Secondary School zirtirtu thahnem tak an kalkhawm a ni.