2421/2023-2024

Hnahthial the 21st Oct 2023: Returning Officer Pu Lalvenhima, Addl. DC ni bawk chuan vawiin khan a office chamber-ah 29-South Tuipui Assembly Constituency huam chhunga MLA inthlanpui neih tura candidate-te nomination paper endikna a nei a, candidate pathumte nomination paper-te hi pawm vek a ni.

Pu Lalvenhima, Returning Officer chuan candidate-te nomination paper chu a endik hnuah candidate dangte leh an agent te endik leh turin a ti a, candidate-te affidavit thehluh endik leh niin fel lo a awm loh avangin candidate pathum te nomination paper hi pawm a ni. Thawhtanni chawhnu dar 3:00 thleng inhnuhdawh(withdrawal) hun hawn a ni a, heta inhnukdawk an awm loh chuan inthlanna neih theih a ni tawh dawn a ni.

Hnahthial District 29-South Tuipui Assembly Constituency-ah hian party pathum Indian National Congress (INC) aiawhin Pu C. Laldintluanga a ding dawn a, Mizo National Front (MNF) aiawh in Dr. R. Lalthangliana leh Zoram People's Movement (ZPM) aiawhin Pu Jeje Lalpekhlua te an ding dawn a ni.