2420/2023-2024

October 21 hi India ram pumah "Police Commemoration Day" atana hman thin a ni a. India ram chhhunga awm Aksai Chin pela ralthuam famkim nena rawn lut ru China sipai rualte chuan mahni ram venghim tura hnathawk (duty) mek India Police-te chu Hot Springs (Ladakh) ah October 21, 1959 ah an lambun a, Police huaisen tak tak sawm (10) lai maiin nunna hlu tak an chan phah a ni. He ni hi Police, ram tana nun pete hriatrengna "Commemoration Day" atan India Sorkar chuan puangin ram pum puiah kum tin hman turin a rel a ni. Hemi ni zing dar 8-ah hian India ram State Capital-ah leh District Headquarters-ah te Commemoration Day Parade neih thin a ni a, India ram puma Police duty laia thite hming chhiar chhuakin anmahni hriatrengna leh sunna urhsun taka hman thin a ni.

Kumin chhung hian vanneihthlak takin Mizoram Police zingah duty laia hmelma kut a thi an awm lo. Kum 1966 atanga vawiin thlengin Mizoram Police zingah, duty laia nunna chan mi 54(sawmnga leh pali) lai an awm tawh a ni.

Mizoram-ah pawh October ni 21 zing dar 7-ah hian District Headquarters leh Battalion Headquarters-ah te Commemoration Parade hi neih a ni a. A hmanna pui ber Aizawl-ah chuan "Martar Thlan" 1st Bn. MAP Headquarters, Armed Veng-ah Pu Anil Shukla, IPS, DGP, Mizoram leh Police Officers ten hun an hmang a, CRPF, BSF, SIB leh Assam Rifles atangin aiawh te an rawn tel bawk a ni. India ram hmun hrang hranga Police, ni 1.9.2022 atanga ni 31.8.2023 chhunga duty laia nunna chan mi 188-te hming chhiar chhuakin; urhsun taka sunna neiin martar thlan ah zahna pangpar dah a ni.