3687/2023-2024

Hnahthial the 6th February 2024: 29-South Tuipui AC Bialtu MLA Pu Jeje Lalpekhlua chuan vawiin khan a bial chhung khua, Tarpho, Khawhri, South Chawngtui leh Cherhlun te a tlawh a, pawl hrang hrang hruaitu aiawhte kawmin school leh sawrkar building siam that ngai te a hmunah tlawhin a enfiah nghal bawk.

Bialtu MLA Pu Jeje Lalpekhlua chuan South Tuipui mipui zawng zawng MLA a ni tiin bial chhung hmasawnna turin theihtawp a chhuah zel dawn thu a sawi. Sawrkar kumthar-ah South Tuipui bial chuan hmasawnna hmel a hmu chho zel dawn tiin an theihna zawnah theuh theihtawp chhuahpui zel turin mitin a sawm nghal. Bialtu MLA chuan sawi zelin zirna te, hriselna te, ei leh bara intodelh te, electric leh tui hnianghnar tura hmalak te, infiamna lama hmasawn zual zel te, ramri leh tourism lama hmalak te, ruihhlo leh sualna hrang hrang a rem theih nana hmalak te, inkal pawhna leh inbiak pawhna tha leh zual tura hmalakte, ran vulh leh thlai chin lama tan la thar turte leh ram pawn thlenga thlai thar chhuahte thawn chhuak turin hma an la chhunzawm dawn a ti a, Sawrkar hmalakna thlawp zel tur leh mahni theihna zawnah theuh hmasawn tura hma la ve theuh turin mipuite a sawm bawk. Bialtu MLA hian tunkar hian a bial chhung khua hrang hrang a tlawh kual chhunzawm zel dawn a, Feb ni 10 ah Hnahthial khawchhunga VC member-te nen inkawmhona an nei anga, Feb ni 12 (thawhtan ni) hian MLA Office hawnna a nei bawk ang.