1798/2025-2026

Dated Aizawl, 22nd August 2025: Vawiin khan Mizoram Youth Commission kaltlanga Spa therapy training tur mi 13-te thlah liamna hun MYC Conference Room-ah hman a ni a, heng mi thlanchhuahte hian August 25, 2025 (Thawhtanni) hian Aizawl chhuahsanin The Lalit Hotel hmunpui, The Lalit Golf & Spa Resort Goa an pan dawn a, he hmunah hian thla 3 (thum) chhung an training dawn a ni.

Vawiina thlahna hunah hian Pu Malsawmzuala Ralte, Chairman, MYC chuan fuihna thu sawiin, Kristian kan nih anga kan tihtur leh tih loh tur hre reng turin a chah a, khawi hmun pawh ni se, mi dangte awmdan anga a tha zawnga insiamrem thiam tur te, kum hnihkhat hnua cruise line-a thawk thei ngei tura taima tur tein a chah a ni. State danga hnathawk tura tirh chhuahte chu dik taka nungtura intiamkamna ziahpui thin an nih thu sawiin harsatna leh buaina an tawh chuan, MYC in hma a lakpui zel tur thu a sawi bawk.

Kum 2024-25 Sawrkar kumah khan MYC hian Spa Therapist tur Mizo thalai mi 15 a lo tir chhuak tawh a, vawiina mite nen an vaiin Mizo thalai 28 tirhchhuah an ni tawh a ni.

He training programme kalpui theih nan hian Mizoram Youth Commission leh Bharat Hotels Limited, New Delhi te chuan thawhhona thuthlung (MOU) an ziak a. MYC aiawhin Pu Malsawmzuala Ralte, Chairman, MYC in a sign a ni.