1797/2025-2026

AIZAWL; the 22^nd August, 2025: Vawiin chawhnu khan Secretariat Conference Hall, MINECO-ah “State Level Orientation On Aadi Karmayogi Abhiyan – Responsive Governance Programme” chu Pu Lalmalsawma, IRS, Secretary to the GoM, Planning & Programme Implementation Department  kaihhruaina a neih a ni a. Kal khawmte lawmna leh kal khawm chhan tlangpuite sawiin hun a hawng a. Pu Roumuan Paite, Joint Secretary & CMD, NSTFDC, Ministry of Tribal Affairs, New Delhi pawh he programme-ah hian Ministry aiawhin a rawn tel a. Aadi Karmayogi Abhiyan-in a tum ber leh kalpui dan tur ruangam a sawi fiah a. Tin, chawhmalamah State Tribal Resource & Training Centre, Kelsih leh Ropuiliani Tribal Freedom Fighter’s Museum pawh tlawh bawk a ni. State Nodal department, Planning & Programme Implementation Dept. atang state chhunga kalpui dan tur leh hemi chungchanga hriat tur tul te inhriattirna an nei bawk. Tin, Pu Khilli Ram Meena, Chief Secretary pawhin kalkhawmte hmaah he programme hman a nih chhan ang taka mizo mipuiten an hlawkpui ngei a duh thu leh lawm thu sawina hun a hmang bawk a ni.

Ministry of Tribal Affairs (MoTA), Government of India bultumin mipuite telna sawrkar, rorelna inkhaidiat tha tak leh chak tak siam turin hmalak mek zel a ni a. Chumi ti chak tur chuan mission tha tak mai Aadi karmayogi Abhiyan – Responsive Governance Programme chu duan a lo ni ta a ni. He mission hnuaiah hian India rama tribal zawng zawngte leh an chenna hmun nen lam ti hmasawn turin sawkar inrelbawlna tha tak kalpui a ni dawn a. He Aadi Karmayogi Abhiyan hnuaiah hian State Master Trainer te, District Master Trainer te, Block Master Trainer te leh Village Level Master Trainer tur te mi nuai sawmhnih (20 lakh) lai India ram pumpuiah training pek tur a ni a. Tunah hian India ram pum hi region hrang hranga thenin, keini NorthEast region hi Regional Process Lab parukna (RPL-6)-ah kan awm a. August ni 11-17 inkar khan State Master Trainer tur mi 8 te tan training buatsaih a lo ni tawh a. Kan hma maiah hian district zawng zawng tan Master trainers mi 65 zet train leh tur a ni dawn a ni. Tin, Block tinah Nodal officers mi 23 zet ruat an ni tawh bawk. Phase I atan Mizoramah bial 8 thlanchhuah an ni.

India sawrkar chuan Viksit Bharat 2047, India Independence vawi 100-na tin zawnin India hi ram changkang (developed country) ni turin hma a la mup mup a. Chumi kal kawngah chuan tribal te tel lo chuan chu raltiang ram chu a kai thei lo tih a hria a. Tribal zawng zawngten hmasawnna tluantling kan neih ve theih nan heng hriselna kaihhnawih (healthcare), zirna (education), hmasawnna ruhrel (infrastructure) leh rorelna tha (good governance) te hi a ngai pawimawh hle a. Tuna tribal te tana scheme hrang hrang awmsate hi thuam thata tih chak leh zual a tum a ni. Tin, he’ng tribal area tana hamthatna awm angte a dawng tur dik tak tribal ten an dawn theih nana uluk lehzuala, chak taka sawkar inrelbawlna kalpui a nih theih nan sawrkar mi leh sate leh a thawhpuite (CSO/NGO) training hmanga infuihthar a, mipuite tana chhenfakawm ni tura inchherchhuah hi a tum ber a ni.

Chumi atan chuan District tin thawhpui tur Civil Society Organization (CSO/NGO) te pawh ruat an ni tawh a. District Responsive Governance Group te, War Room te pawh duan a ni tawh bawk a ni. Hun rei loteah hian District Process Lab te, Block Level Process Lab te pawh kalpui a ni dawn a. He’ng bakah hian chak lehzuala mipui lungawi lohna chinfel a nih theihna tur lungawi lohna leh ruahmanna neite tana thlenna tur hmun Seva Centre (Grievance Redressal Mechanism)din a ni dawn a. Department hrang hrangte pawh he mission hnuaiah hian awmze nei taka thawhhona (convergence) tha tak siamin, tangkai taka khaw hmasawnna tura Village Action Plan te pawh siam thin a ni tawh dawn a ni.

He mission hnuaiah hian department hrang hrangte'n mahni chanvo theuh te tlin taka hlen tura ngen an ni a. Tin, Village/Local Council zawng zawngte pawh he mission hnuaiah hian Special Gram Sabha-te lo nei tur leh, Gram Sabha remchang apiangah remchang siama mipuite a tam thei ang bera an hriat theih nan leh thawhhona tha kan neih theihna tura hma lo la tura ngen leh hriatir an ni bawk.