1796/2025-2026

Lunglei, 2025 Thlazing ni 22: Lungleia Saikuti Hall enkawlna Lunglei Municipal Council (LMC) kuta dah a nih hnua a hmasa ber atan, vawiin khan LMC thuneitute chuan Chairman Pu Lalzuithanga hovin Saikuti Hall chu tlawhin, a dinhmun leh hma lak dan tur an enfiah.

Nimin, August ni 21, 2025 khan Saikuti Hall Managing Committee leh LMC inkara inremna leh intiamkamna, 'terms & conditions' thuthlung ziah fel niin, Saikuti Hall enkawlna (management) chu LMC kutah hlan fel a ni a. Vawiin khan LMC hotute chuan a dinhmun leh a enkawl zui zelna atana thil ṭul turte zir chian pahin Saikuti Hall hi an tlawh nghal a ni.

Saikuti Hall tlawhnaah hian LMC aṭangin Chairman Pu Lalzuithanga, Vice Chairman Pu K. Lalrinawma, Executive Councillor - Pu Zorinsanga Hmar leh Pi Lalhruaitluangi Sailo, Councillor Pi Lalmuanpuii Renthlei, Secretary Pi Zoramdini leh official dangte an tel a. Saikuti Hall-a puipunna pindan (auditorium) leh pindan hrang hrangte en kualin, chei ṭhatna atana ṭul leh pawimawh tur hrang hrangte an sawi ho.

LMC Chairman Pu Lalzuithanga chuan an dilna ngai pawimawha sawrkar thuneitute'n Saikuti Hall enkawl hna LMC kuta an dah fel ta chu lawmawm a tih thu sawiin, Saikuti Hall chu Lunglei hmel lanna leh Lunglei ti-Lungleitu pakhat a nih angin a ṭha thei ang bera enkawl an tum thu a sawi a. Saikuti Hall enkawl chu a hautak avangin duhthu sam lo lai leh chei ṭhat ngai eng emaw zat a awm tih sawiin, sawrkar inhawnna azarah State Priority Projects (SPP) aṭangin a chei ṭhatna tur sum awm thei dawna a lan thu leh a chei ṭhat kawngah hma lak chhoh a nih tur thu a sawi a. LMC chuan mipuite leh Saikuti Hall ṭhatna duhtute nen theih tawp chhuah tlangin ṭha tak leh mawi taka Saikuti Hall chei ṭhat theih an beisei thu sawiin, chumi atan chuan mipuite thawhpuina leh ṭawiawmna a ngen a ni.