Vawiin khan Mizoram Legislative Assembly Speaker Pu Lalrinliana Sailo hovin Assembly Annexe Conference Hall-ah Assembly Secretariat hnuaia officer leh staff zawng zawngten Pathian hnena inhlanna leh Kumthar 2019 thingpui inhona hun an hmang. Kumthar Inhlantharna inkhawm hi Pu S.R.Zokhuma, Commissioner & Secretary, Mizoram Legislative Assembly-in a kaihruai a; Under Secretary Pu Lalthangmawia’n hunserh a hmang a; Speaker Pu Lalrinliana Sailo, Dy. Speaker Er. Lalrinawma, sawm bik Ex-MLA Pu K.Vanlalauva bakah Addl. Secretary Pu H.Lalrinawma ten kumthar atana fuihna thuchah an sawi theuh a ni.

Assembly Speaker Pu Lalrinliana Sailo chuan Assembly Secretariat chu Speaker thutna a nih avang leh sorkar mi pawimawh berte enkawltu an nih avangin hmun pawimawh leh zahawm a ni a, chuvangin he office-a thawkte pawh thianghlim tak, nun uluk tak, zuk leh hmuam, zu leh ruihtheihthil dang lakah pawh an fihlim thei tur a ni, a ti. Assembly Secretariat dawrtute tha taka lo dawngsawng zel tura hrilhin Speaker chuan he office hi sorkar thil leh thu pawimawh tam tak buatsaihna ber a nih avangin a thawktute pawhin Assembly House zahawmna ‘sanctity & secrecy’ hi an vawn zel a pawimawh takzet a ni tiin a hrilh bawk.