Vawiin Ni 9.1.2019 khan School Education Minister Pu Lalchhandama Ralte chuan Lynchpin School Connect chu Vanapa Hall-ah a hawng.

Minister chuan thusawiin Zirna kawngah mahni tuipui leh duhthlanna ngei hmanga thutlukna siama zir a pawimawh a ti a. Zirlaiten eizawnna turah thutlukna  dik an neih theih nana kawng inkawhhmuhna Lynchpin School Connect buatsaih a ni chu lawmawm a tih thu a sawi a. Higher Secondary School-a zirlaite zingah hian hma lam thlirna nei rana lehkha zir an tlem tih sawiin matric pass hnua zir zui tur thlan chauh mai chu a that tawk loh thu leh thiante tuipui ang thlang ve mai lovin mahni tuipui leh duhthlanna ngei hmanga  thutlukna siam ngei  a pawimawh thu a sawi. Mizo zirlai tam takin an tihfuh loh fo chu thenawmte damdawi ngeih ang lo ei ve ngawt te, thianten Science an lak avanga lak ve ngawt te a ni a ti a. School naupangten an kawng zawh tur thlan nan Lynchpin School Connet chu hlawkpui ngei se a duhsak thu a sawi.

Lynchpin School Connect hi School level tana buatsaih hmasak ber a ni a, kum hmasa lamah chuan Zalen chanchinbute nen tangkawpin Education Fair leh Edufest te an lo buatsaih tawh a ni. Kum dangah Higher Secondary School zirlaite an tinzawn ber thin a, hei hi a tawk lo deuh nia hriain High School zirlaite tan he programme hi buatsaih leh a ni. School Connect hian zirlaite chu eizawnna atan engnge an zir dawn tih kawhhmuh a tum ber a, an thil tum tihhlawhtlin nan engtianga zir chhoh zel tur nge tih te kawhhmuh an tum a ni.

Lynchpin School Connect-ah hian India ram chhunga University  thenkhatte rawn theihin an thu a, India ram pawn UK leh Canada-a zir dan te pawh an kawhhmuh a ni. Vawiin khan zirlaite  kawng kawhhmuh nan Vanapa Hall-ah hian seminar neih zui nghal  a ni a, Aizawl khawpui chhunga High School leh Higher Secondary School thenkhat zirlaite an kal khawm a ni.