Lunglei High Powered Committee chu kum 2019 atana Lunglei District mipuite hmasawnna hmanrua pawimawh tak a nih zel theih nan vawiin khan HPC Conference Hall-ah Pathian hnena hlanna leh lawmthu sawina hun hman a ni. Vawiin inkhawm hi Dr Lalrinchhana, Chief Planning Officer, HPC in kaihruaiin Rev. H Lianngaia’n hunserh a hmang a ni.

HPC Vice Chairman leh Lunglei East AC bialtu MLA ni bawk Pu Lawmawma Tochhawng chuan Pathian leh mipui zara dinhmun pawimawh tak luah theiha a awm chu a lawm thu leh, ram hmasawnna atan theihtawp a chhuah tur thu a sawi a. HPC Vice Chairman hmasate hma lo lak tawhna te chhuanawm leh ropui a tih thu sawiin HPC sum kaltlanga ei leh bar kawnga intodelhna leh mipuite tana eizawnna ngelnghet siam sak a duh thu a sawi a. Thalaite a ngaih pawimawh thu sawiin HPC Vice Chairman chuan nakin lawka ram hruaitu la ni mai tur thalaite chu mahni inrintawkna nen rim taka thawk tur leh mizo nun ze mawi taimakna, rinawmna leh tlawmgnaihna te chhawmnung zel tura kan kaihhruai a tul a ni, a ti a. “Lunglei District tan mellung kan phun tlan theihnan tan I la ang u” tiin Pu Lawmawma Tochhawng chuan kalkhawmte chu thawhho puiah sawmin inthlahrung hauh lova thurawn pe fo thin turin a ngen a ni.

Vawiin programme-ah hian Ex-Minister Pu ZH Ropuia, Lunglei Additional DC Pu Benjamin Lalzama leh Department hrang hrang District official-te, Lunglei District MJA hruaitute, tlawmngai pawl  hrang hrang aiawhte leh khawtlang hruaitu thahnem tak an kalkhawm a. Inkhawm neih zawh hian kalkhawmte hian thingpui ruai an kil ho a ni.