Vawiin khan Chapchar Kut Organising Committee chuan an Chairman, Chief Minister Pu Zoramthanga hovin kumin Chapchar Kut hman dan tur CM Conference Hall-ah an rel a, Meeting-ah hian Art & Culture Minister Pu R.Lalzirliana, Committee Co-Chairman pawh a tel a ni.

Chief Minister chuan Chapchar Kut chu Mizo kutpui a nih angin zau leh lian thei ang ber a hman zui zel tha a tih thu sawiin mawhphurhna chelhtu ten inpe taka an lo thawh tawh thinna chu a fak a, kumin atan pawh thahnemngai taka thawhho puiah a sawm.

Kumin Chapchar Kut hi Aizawl Sipai Lammualah hman leh tura ruahman a ni a. Chapchar Kut Organising Committee chuan February ni 28 leh March ni 1 chu kumin Chapchar Kut lawmna ni ah rel in, February ni 28 chu Mizo infiamna hrang hrang entirna ah hmangin, Art & Culture Minister Pu R. Lalzirliana chu Kut Pa ni turin a ruat a; March ni 1 chu a lawmna ni pui ber a hman turin leh Kut Pa atan Chief Minister Pu Zoramthanga chu a rel. Kumin Chapchar Kut thupui atan "Zofate Inpumkhatna" tih chu thlan a ni a, kumdang ang bawkin Chapchar Kut hi Kut chhung hian mipui zingah Mizo hnam ziarang pho lang tam thei tur zawngin hnam thuam inbel uar tura inhrilh ni se tia rel a ni.

Kut pual hian painting leh photo exhibition te, flower show, food court siam leh handloom & handicraft exhibition buatsaih leh tum a ni a. Vawiin meeting-ah hian chanvo leh mawhphurhna semzai niin, hun hman dan tur kimchang duang turin Programme Sub-committee chu Art and Culture Director kaihhruaina hnuaia din chuan a ngaihtuah dawn a ni.