Assam Cultural Society (ACS) Aizawl Mizoram in an Kut pui ber – Rongali Bihu lawmna hun vawiin khan Vanapa Hall-ah an buatsaih chu Mizoram Legislative Assembly, Speaker Pu R. Romawia’n khuallian niin a hmanpui. He hunah hian ACS in Rongali Bihu puala Souvenir an buatsaih chu a tlangzarh nghal a. ACS hruaitu Dr. D K Barkakati; Dr. Tridib Rajkhowa leh Dr. P. Gohian te chuan Speaker hi Assamese Japi(lukhum), Gomcha leh Assamese te kuhva bawm (dar hmanga siam) te an hlan bawk a ni.

Pu R. Romawia chuan Kut hmang tura lokal te chu duhsakna hlan in an Society thupui (motto) hnam ze hmanga inpumkhatna (Unity through culture) tih chu ropui a tih thu a sawi a. Speaker hian India hi ram zau tak ani tiin mual leh khua awm danah te, culture leh hnam ziarang ah te, ei leh barah te leh sakhuana ah te ram mipui, Hmarchak bial huapin, in anlohna leh danglamna hrang hrang awm mahse inpumkhatna rilru in nghet taka hrui khatin min phuar khawm a ni a ti.

Hnam hrang hrang ten zalen leh nuam takin an Kut an hmang thin te hian hnam impumkhatna atak in a awm ngei tih a lantir an ni a ti bawk. Speaker hian mahni chenna state ni lovah mahni Kut hman te hi thil tha ani a, hei hian mahni hnam inkarah inuanuana leh induhsakna boruak tha athlen thin thu a sawi bawk.

Vawiin Rongali Bihu lawmna programme ah hian Assamese hnam lam leh zai chi hrang hrang bakah Hmarchak state hrang hrang te lam entir a ni a. Ram buai avanga Assam a pem leh tun thlenga North Lakhimpur District a cheng Pu Vanlalvuana Khiangte, in Assamese lam Xatriya nalh tak a entir chuan mipui lawm a hlawh hle a, amah hi hetiang lam zirna sikul ah hian Principal a ni nghe nghe a ni.

Assam Cultural Society hi kum 2004 khan din ani a tunah an pawl President hi Dr. D K Barkakati, HOD Physics Dept. PUC a ni.