Prime Minister Dr.Manmohan Singh-a’n National Counter Terrorism Centre (NCTC) chungchanga Chief Minister zawng zawngte nimin a New Delhi-a a kohkhawmna ah, Chief Minister Pu Lal Thanhawla pawhin a Chief Minister puite hmaah thusawiin, Prime Minister in hetiang thil pawimawh tak chungchanga Chief Minister te sawipui tura a kohkhawm chu a lawmawm tak zet a ni a ti a. Chief Minister chuan firfiaka chetna (terrorism) hi ram ralmuanna tichhe theitu anih avangin rampum himna ngaihpawimawh hmasak ber a tul a ni tih hria a, sorkar laipuiin a NCTC a duanchhuah hi a thlawp thu a sawi a. NCTC din anih avang hian sorkar laipui leh state te inlaichinna (federal structure) a chhiat phah a rin loh thu a sawi lang bawk a ni.

Sorkar Laipuiin NCTC a din hi Congress sorkar na state zawng zawngte chuan an thlawp vek laiin, state thenkhatin duh loh lai an nei a; abikin NCTC thuneihna - indap, inhren leh inman theihna te hi siam that an phut a. State tlemte in centre - state inlaichinna(federalism) tihchhiatna a ni tiin an hnawl bawk a ni. Union Home Minister chuan Chief Minister te thusawi leh rawtna an neihte chu ngun taka a ngaihthlak hnuin, an duhdan te chu lo enzui in sorkar laipui chuan thutawp a la siam dawn a ni a ti.