Assembly Speaker Pu R.Romawia chuan a bial chhung fan programme a duan angin vawiin khan a hmasaber atan Bawngkawn a tlawh a. Local Council leh tlawmngai pawl hrang hrang hruaitute nena inkawm hona hun tha tak Bawngkawn YMA Zawlbuk-a an neih ah khawtlang mamawh hrang hrang a bikin vengchung inkalpawhna kawng chungchangte leh eng leh tui chungchanga an mamawh te bialtu MLA Pu R.Romawia hnenah khawtlang hruaitute hian an thlen a. Speaker hi PWD, PHE leh P&E aiawh ten an tawiawm a ni. Department pathum aiawh te hian hemi kawnga hma an lak tum dan theuh, khawtlang hruaitute an hrilh bawk a ni.
Speaker chuan Bawngkawn chu veng thang zel a nih thusawiin Brigade ram hman tangkai leh cheibawlna lamah Sorkar in ngaihtuahna nasa takin a seng mek a ni a ti a. Kawng hrang hranga Brigade ram hman tangkai theih dan, a bikin zirna tih hmasawnna lamah te, thalai nun chawhphurna leh an hun awl tangkai zawka an hman theihna lamah te leh Mizoram hmel ti mawitu thei thil hrang hrang dah te chu a thusawi ah hian Speaker chuan a tarlang bawk a ni. Speaker hian Bawngkawn vengchung hmun thenkhat te a tlawh nghal a ni.
Duan lawk ang chuan naktuk hian Bawngkawn ‘S’ a tlawh anga, June 22 hian Selesih a tlawh leh ang a. June ni 26 – 28 inkarah Durtlang ‘N’, Durtlang leh Leitan te a fan bawk ang.
