Mizoram Cooperative Apex Bank Ltd. chuan vawiin khan Vanapa Hall ah Annual General Conference vawi 19-na an hmang a, Cooperation Minister Pu J.H.Rothuama’n a hmanpui.
Khuallian Minister Pu J.H.Rothuama chuan thusawiin ram a thana hma a sawn dawn chuan cooperative society chu a pawimawh tulh tulh dawn a ni, a ti a. India ram state lian leh changkang zawkah te pawh cooperative society lian tak tak an neih thu leh state mipui te hmasawn nana hma an lak nasat dante a tarlang. Mi rethei leh harsa te chhanchhuahna tura Sorkarin NLUP chak taka a kalpui mekna ah te pawh cooperative society te chu an tel ve ngei a la ngaih tur thu te a sawi a, ram hmasawn zelna karah mipui te thawh ve theih chu cooperative society a nih hriaa mi tam zawk ten Apex Bank kaltlanga malsawmna an chan theih nan theihtawpa tan la chhunzawm zel turin Shareholder leh thawktu te a sawm bawk. Kum kalta lama Bank-in sum a hloh thin, tuna hlawkna an nei chho ta chu Bank hmasawnna lawmawm tak a ni tiin Minister chuan Board memberte thawhrimna, thawktute inpekna, leh shareholder te thahnemngaihna avangin lawmthu a sawi a. Sum hlawkna tam zawk thawk chhuak tur leh Sorkar inawlh ngai lova mahni kea ding thei tura tan la zel turin a chah bawk. Lungrual taka tanhona ah hmasawnna a thleng thin tiin Pu J.H.Rothuama chuan kalkhawmte chu anmahni veng/khua theuhvah cooperative society changtlung zawk din tum theuh turin a chah bawk a ni.
MCAB 19th General Conference hi MCAB Chairman Pu J.C.Chawngvawra’n a kaihruai a, Managing Director Pu James Hruailiana’n report pe-in Chairman hlui Pu Biakliana sunna hun te hman a ni. MCAB hian Mizoram puma District Capital 7 leh Aizawl khawpui chungah a zavaiin Branch 12 a nei a, thawktu 141 an awm mek a ni. Kum 2011-2012 chhunga Deposit hmuh tum zat Rs 32,400 lakhs a nih laiin Rs 37,223.30 lakhs hmuh a ni a, Loan pek tura ruahman Rs 7,332 lakhs anih laiin Rs 9,663.70 lakhs pek chhuah a ni bawk. Sum hmuh tura beisei Rs 3,260.96 lakhs a nih laiin Rs 4,155.17 lakhs hmuh a ni bawk. MCAB hian Champhai ah a thlawna inentirna Free Health Clinic te an buatsaih bawk a ni.
Chawhnu lamah Rorel neiin Annual Report 2011-2012, Annual Statement of Accounts 2010-2011, Budget & Credit Plan for 2012-2013, Amendment of Bye Law, leh tul dangte an ngaihtuah ho dawn a ni.
