Vawiin khan Aizawl District Village Council President Conference chu District Local Administration Office (DLAO) Conference Hall-ah neih a ni a, LAD Minister Pu P.C. Lalthanliana’n a hmanpui.
LAD Minister chuan Village Council President te chu eirukna daltu khawngkhar vengtu pawimawh tak an ni, a ti. Sorkar department hrang hrang hnuaia thawktu ten khawtlang hmasawnna tur hna an thawhna kawngah diklo taka, a nih tur ang ni phalo a hna an thawk a nih chuan VC ten khauh takin an dodal ngam tur a ni, tiin VC ten khawng taka an thuneihna an ken tlang ngam phawt chuan department a thawktu ten an namnul mai mai ngailo, a ti. Pu P.C. Lalthanliana chuan VC te kutah hian Mizoram hmalam hun tur thui tak a innghat a ni tiin mahni ram chhung humhalh nachang hreloa mimal hnena an ram tiraltu te hian hmasawnna an tithuanawpa, sorkar pawh hma la theilovin an siam a ni, a ti a, khawtlang siam tha tu an nih theih rualin a tichhetu an ni thei tih inhre turin VCP kalkhawm te a hrilh a ni. 13th Finance Commission-in VC hnathawk tha te tan Performance Grant nuai 100 chuang Mizoram a pek atangin Aizawl District huamchhunga Village Council 91 awmah 22 in an dawng a. A thawk tha te chauhin an dawn theih he tanpuina sum hi dawng thei turin hna thawh that kawngah Village Council tin te inel turin a fuih a, dawn theuh tuma theihtawp chhuaha khawtlang tana hna thawk turin Minister chuan a fuih a ni. VC te inkaihhruaina dan chungchang pawh sawilangin LAD Minister chuan he dan hi a hlui tawh avangin ennawn a tul tawh hle a, thlak tumin sorkar chuan hma a la mek tih a tarlang bawk. Khawtin VC te an ram huamchhungah Village Park atan ram humhalh turin a chah a, ram hmasawn zelah khawpui chep lutuk kara hawikhawthawnna hmun tur, thalaite leh chhungkaw tana len vahna hmun humhalh hram hram a pawimawh tiin ram humhalhna kawnga hma la tha khua te tan chuan a bika tanpuina pawh a awm theih thu a hrilh nghe nghe.
Pu P.C. Lalthanliana hian vawiin inkhawmah hian Aizawl District huamchhunga VC 91 te tan Steel Almirah pakhat theuh a sem a ni.
Aizawl District Village Council President Conference hi an Convener, N. Lungleng VCP Pu Lalchhuanawma’n a a kaihruai a. District Local Administration Officer Pi H. Lalchhandami pawhin VCP te tana hriattur pawimawh a sawi a ni. Chawhnu programme ah rorel leh hruaitu thar thlanna hun an hmang a ni.
