Vawiin khan Pu Lalrinliana Sailo, Speaker, Mizoram Legislative Assembly chuan Buhban khua a tlawh a. Buhban khuaa YMA dincham vawi 68-na lawmnaah khuallian niin a tel nghal a ni.

YMA, Buhban Branch din champha  lawmna programme hawngtu Pu Lalrinliana Sailo chuan  YMA dintu mi hmasa te kha Pathian thuawih an nih avangin YMA rawngbawlna pawhin malsawmna a dawng chhunzawm zel a ni a ti a. Buhban Branch YMA te pawn hun pawimawh bik an hmang leh thei chu a lawmpui tih a sawi a ni.

Speaker Pu Lalrinliana Sailo chuan khawvel sik leh sa inthlak nasa lutuk leh boruak lum chak lutuk siam that kawngah Mizoram pawh kan indah awl thei bik lo tih a sawi a. Thingtlang lama kan ramngaw chereu zel tur ven hna thawh leh ramngaw kan neih mek te duat taka enkawl hi kan vaia rawngbawlna intawm  a ni a ti a. "Ram leh Hnam humhalh kawnga YMA hmalakna huangah pawh hian ramngaw leh nungchate humhalh pawh a tel tih kan hriatthar leh theuh a ngai a. A bikin Chalfilh Tlang bul thuta khua awm te kan tan nasat leh zual a ngai", tih a sawi a. Chalfilh tlang a rawn ngaw that leh chuan khualzin hiptu tha,tak, a bul vela khawtual mite tana eizawnna siamtu a ni thei dawn a ni a ti.

Khawtinah zirtirtute mawhphurhna a sang bik tih a sawi a. Zirlaite mipuitling siam hna thawktu an nih avangin zirtirtute chu vantlang rawngbawltu ni sa an ni a, zirna huangah lo chuan pawl thiltihah khawtlang pawhin mawhphurhna pekloh an thiam a ngai a ni a ti.

Young Mizo Association Buhban Branch din champha lawmna puala vantlang inkhawm hi Community Hall-ah neih a ni a. He hun hi infuihna, intihsiakna leh intihlimna atan  khawtlang huapin hman a ni a. Tlaiah Ruai buatsaih a ni bawk a ni.