Nimin chawhnu dar 3:00 khan Mizoram Youth Commission Chairman, Dr.Vanlaltanpuia'n Multipurpose Hall thar "HYVE AIZAWL CITY HALL"  chu mipuiten tangkai taka an hman turin a hawng.

Ribbon chep chat a Hall a hawn zawhah Dr. Vanlaltanpuia chuan thu tawi sawiin, Mizo thalai ten a tha zawnga changkanna kawngah hmasawnna kawng kan zawh zel hi thil lawmawm tak a ni a ti a. Mizoram Sawrkar leh Mizoram Youth Commission(MYC) pawhin ruahmanna mumal tak neiin, Youth Development Programme hrang hrang tihhmasawn kawngah theihtawp an chhuah zel dawn a ni tih sawiin, Mizo thalai ngeiin Multipurpose Hall tha leh changtlung, Mizo mipuiin tangkai taka kan hman theih tur a buatsaih thei te hi a lawmawmin, Mizo thalaite hmasawnna pakhat a ni a ti a, Mizo thalaite chu mahni theihna leh thiamna zawn theuhah mahni ke a ding thei ngei tura inchherhriam zel turin a chah bawk a ni.

HYVE AIZAWL CITY HALL hi Mizo zaithiam lar leh Event Management lama sulhnu nei tha tak, Henry Varte siam a ni a. He Hall hi Multipurpose Hall tura duan, Hall zau nuam tha tak leh Dining Room tha tak bakah Karaoke Room te nena thuam a ni a. Event hrang hrang buatsaih theihna tur hmun niin; Meeting, Inneih lawmna, Man hlan, Birthday lawmna leh a huhova programme hmang duhte tan, man chawia hman theih tur a ni dawn a. Engtik hunah pawh he Hall hi hman hawh theih tur a ni ang.

HYVE AIZAWL CITY HALL hi JL Building, Tuikual South; Directorate Of Transport building bula awm a ni. Booking ti duh tan Instagram lamah Hall hming hian account siam a ni a. A neitupa, Henry Varte hnenah pawh booking tih theih a ni.

Hall thar hawnna hi Varsangzuali Varte-in a kaihruai a. Rev. Dr.H.Vanlalruata, Aizawl Theological College chuan Pathian hnena hlanna hun a hmang a ni.