Lunglei District chhunga Sawrkar hnathawkte inpawh tlanna leh thawh hona tha awm theihna tura Lunglei DC Office leh Lunglei District Badminton Association te buatsaih, Lunglei District Inter Office Badminton Tournament ni nga chhung awh chu vawiin khan zawh fel a ni.

He Tournament kharna inkhawm hi Bazarveng Indoor Stadium ah neih niin Pu Lalsanglura SDC in a kaihruai a, he hun a khuallian Lunglei SP Pu C. Lalthanmawia chuan District khata sawrkar Department hrang hrang, Sawrkar pakhat leh Dist. inrelbawlna pakhat hnuaia awm te tum ber chu mipui leh ram rawngbawl a ni tiin, thawktute inpawhna leh thawh hona tha chu thil pawimawh tak a ni tiin chumi atana tournament khelh ho a ni chu hlawk thlak a tih thu a sawi a, infiam miten talent tha tak tak an neih laiin insumtheihna leh  teirei peihna an tlachham thin chu thil pawi tak a ni tiin tum ruhna nen sang zawk thleng thei tura bei zui zel turin infiammi kal khawmte a chah a ni.

Inter Office Badminton tournament kharna inkhawmah hian Organising Secretary Pu CMS Dawngliana chuan report pein Lunglei district chhunga Badminton Tournament awm tawhah chhuak an tam ber tum a nih thu sawiin infiammi 356 te an inkhel tih a sawi a, LDBA Sr. Vice President Er. K. Lalhmingmawia pawhin Tournament chhunga inpawhna leh innelna thar lo piang chu hnathawhna zawnah pawh chhawm nun zel a pawimawh thu a sawi bawk a ni.

Attachment

  • Loading attachment...