Mizorama sik leh sa inthlak danglam chho zelin nghawng a neihte leh science thiamna hmanga a do let dan tur inzirtirna, 'awareness  programme on the science of climate change in Mizoram' chu nimin khan Mizoram Science, Technology & Innovation Council (MISTIC) hnuaia State Climate Change Cell leh Lawngtlai DC office tang kawp bul tumin Lawngtlai DC Conference Hall-ah buatsaih a ni.

He hun hi Lawngtlai Bawrhsap Pi Shashanka Ala, IAS chuan hmanpuiin, sik leh sa danglam (climate change) chu a taka thil thleng, khawvelin a buaipui nasat em em a ni a, theih tawpa do let a nih loh chuan harsatna lian zawk kan la tawk chho zel dawn a, do let turin mipui kan tan rual a pawimawh a ni, a ti.

MISTIC-a Member Secretary, Chief Scientific Officer Dr RK Lallianthanga pawhin thu sawiin, climate change do let turin science thiamna chu a taka hman a ngai a, a bikin thingtlanga lo nei leh huan siama ei zawngte'n an hman theih tur kawng dap chhuah a tul a, hemi kawngah hian sawrkar, mipui leh zirlaite'n mahni zawn theuhva hma lak a pawimawh hle a ni, a ti.

MISTIC-a Project Scientist Pi H. Laldinpuii leh Scientist-B Pu Lalthanpuia te'n science thiamna hmanga climate change do let a nih theih nana hma lak dan tur leh thil pawimawh te powerpoint presentation hmangin an sawi zau va. Sawi hona hun leh zawhna leh chhanna hun hlawk tak hman a ni bawk.

He hun hmanah hian Lawngtlaia sawrkar department hrang hrang, tlawmngai pawl ai awh leh zirlai naupangte an tel.