Vawiin khan Assembly Speaker Pu R. Romawia chuan Government Primary School I Durtlang Sikul kum za tlin (Centenary) lawmna programme M.C. Hall Durtlang-a an buatsaih chu khuallian niin a hmanpui. Centenary lawmna programme ah hian Pi Esther Lalruatkimi, Secretary School Education Department chu khualzahawm a ni a, Centenary lawmna programme hi Organizing Chairman Pu H. Zathuama’n a kaihruai a ni.

Pu R.Romawia chuan Durtlang Primary School I kum za tling ta chu Durtlang mipuite lawmpuina hlanin zirna lama mithiamte ngaihdan - mahni pianpui tawng ngeia elementary (primary) education kalpui a tha ber an tih thin thu chu a dik a ni a ti. Speaker chuan Mizo tawng a zirna in ngaihnepna leh hmusitna ah tawh fo thin chu pawi tiin hetianga ngaihdan kan nei avangin Mizo tawng dik lo taka ziah leh hman hmuh turte a tam thu a sawi.

Pu Romawia chuan Zirna chu sum leh pai, ro leh ram aia ropui a nih thu sawiin zirna chu sum peipunna(investment) lian ber leh ropui ber a ni ti a. Speaker hian tunlai nun leh moral tla chhe mek chu pawi tiin Mizo nun zemawi, Kristianna in a belh chah(reinforce) chu a taka nunpui leh char thar a tul a ni a tiin hei hi hnam dinchhuah theihna leh hnam damna a nih theih thu a sawi.

Speaker hian he Sikul ah lo thawk tawh zirtirtu hmasa te leh Head Teacher pension tawh te hnenah chawimawina thuziak a hlan a; Souvenir lei nan Rs.10,000 a pe bawk a ni.

Pi Esther Lalruatkimi chuan Education Department din chhan ber chu naupang te an ni tiin an hmakhua ngaihtuah chu Department hna ber a nih thu a sawi. Sorkar chuan zirtirtute hamthatna a ngaihtuah thin angin zirtirtu te inpekna chu tun aia nasa zawk Sorkarin a phut let ve a ni a ti. Pi Estheri hian Centenary Souvenir a tlangzarh bawk a ni.

Durtlang Primary Middle School I hi January 1911 a din tan niin hemi kum vek August ni 7 khan zirlai 17 nen zirtirna tan a ni a. Zirtirtu hmasa ber chu Pu Laibata niin a dawttu chu Pu Pachhunga a ni. Kum 1935 leh kum 2005 chhung khan mi 85 in he Sikul atangin hian Merit Scholarship an lo dawng tawh a ni.