Mizoram Legislative Assembly Speaker Pu R. Romawia chuan vawiin chawhnu khan Synod Conference Hall-ah Ex-Deputy Speaker Pu Lalthan Kunga lehkhabu ziah pathum - Hringnun Piah ram (Life Beyond Death) te, Ni Hnuhnungte (A Comprehensive Study of Eschatology) Bu Khatna leh Bu Hnihna te a tlangzarh.
Speaker Pu R. Romawia chuan Mizorama Kohhran hmasate'n Mizo tawnga lehkhabu an lo siam thuai kha Mizote inpumkhatna atan a tangkai hle tih a sawi a. Speaker chuan Mizo tawng lehkhabu a chhuah tam theihnan theihtawp a chhuah ve thin thu leh Mizo tawng lehkhabu chhuah tam deuh deuh a tul thu sawiin lehkhabu ziaktute tana sponsor leh fund tha tak ruahman a tul thu a sawi bawk. Tunlai chanchinbu-ah te thil tha aiin tha lo lam a lang tam tawh a, chanchinbu headline leh front page-ah hnam nun chawm lo chi te chu hman loh theih a that thu a sawi bawk. Speaker hian lehkhabu tlangzarh takte hi ni hnuhnung atana kan inbuatsaihnan a pawimawh thu a sawi bawk a ni.
Lehkhabu ziaktu Pu Lalthan Kunga chuan lehkhabu a buatsaih dan sawiin Pathian thu ziktluak kan inzirtira kan zawm chuan Mizoramah corruption leh sualna chi hrang hrang a kiam mai ang a ti a; Kohhran chhungah Pathian thutak dodalna a awm thin avangin Kohhranin a tlakchhiat phah fo a ti bawk. Mizote hian thlarau khawvel hi kan sawi nasa a; chutih rualin mithiamte zir dan chhiar leh tih tak taka chhuitu kan tam lo tih a sawi a. Heng lehkhabute hian hnialna leh sawiselna a tawh a beisei lawk tih sawiin chung chuan ni hnuhnung atana kan inpeih theihnan rah tha a chhuah a beisei tih a sawi bawk.
Tlangzarh inkhawm hi Prof. Dr. Laltluangliana Khiangte-in a kaihruai a. Upa Dr. P.C. Biaksiama'n lehkhabu sawi hawnna leh thlir zauna hun a hmang a, Rev. Lalthangliana'n Pathian hnena hlanna hun a hmang a ni.
