Assembly Speaker Pu R Romawia chuan vawiin khan Durtlang a Home leh Centre hrang hrang pariat tlawhin Krismas duhsakna a hlan a, Krismas thilpek leh Krimas card te a hlan nghal theuh bawk a ni.
Speaker in Home leh Centre a tlawh te chu – Zoram Evangelical Foundation (ZEF) enkawl Hermon Children Home; Mission for Christ enkawl Abundant Life Home; HIV veite enkawlna hmun Grace Home; Synod in a enkawl Hmangaihna In, Missionary Sisters of Mary Help of Christians te enkawl Fernando Integrated Women Development Centre ‘Peace Home’; Juvenile cum Observation Home (Remand Home tih a hriat); Servants of God Campaign Centre leh Jeriko Khualbuk te an ni.
Heng hmun a tlawh naah te hian Speaker chuan Home leh Centre enkawltute inpekna, mi harsa, mi chanhai, midang aia dinhmun khirhkhan taka dingte, hmangaihna,duatna leh lainatna nena an enkawlna chu ropui tiin Pathian rawngbawlna ropui tak anih thu te a sawi a. Heng Home leh Centre a awmte chu beidawnna nei lo tur a fuihin, Pathian in a hriat reng theuh thu leh Pathian in a kaihruai zel ang tih rinna nghet tak a neih thu a sawi bawk a ni.
Hermon Children Home a hian naupang kum 3 leh kum 18 inkar mi 120 vel an enkawl mek bakah tunhnai khan Sorkarin naupang 18 vel enkawl turin a pek belh a. Abundant Children Home a hian naupang kum 3 leh kum 16 inkar mi 22 an enkawl mek a. Grace Home, khum 30 awmna ah hian mi 16 an enkawl mek a. Nausen leh naupang thla 4 leh kum 6 inkar mi 26 chu Hmangaihna In ah hian an kawl a. Peace Home ah hian hmeichhe hmeichhia zu leh ruihthei thil lamah harsatna nei mi 30 vel an enkawl mek ve thung a ni.
