Tukin khan Speaker Pu Lalrinliana Sailo chuan Khawhai leh Lungtan khaw inkar kawng siam mek chu a hmunah kal in a endik a, thawktute kawmin thahnemngai tak a kawng siam turin leh a nih dan tur ang taka hna thawk turin a chah.

Pu Lalrinliana Sailo hi Pu Lalnuntluanga, SDO Khawzawl bakah Khawhai leh Lungtan khawtlang hruaituten an tawiawm a, hmalakna kalpui dan leh chhunzawm zel dan tur te sawi ho a ni.

Speaker hian Sailothanga Memorial High School, Lungtan tlawh nghalin thawktute nen School dinhmun leh harsatna awm te an sawiho a. Pu Lalrinliana chuan sikul naupangte pawh kawmin an zirlai bakah nungchang mawi leh tha zir chhuak tel turin a fuih a, khawtlang tana mi tangkai ni tura an thiamna chhawr tlaka zir turin a chah a, zirlai te cho phur nan MBSE board exam a titha te hnenah lawmman a ruahman tur thu a sawi bawk.

Lungtan a tlawh zawh hian Speaker hian Khawhai Playground Pavilion a hawng a, Deputy Chief Minister hmalakna zar ah Khawhai leh a chhehvel khaw dang ten hmasawnna nasa tak an dawn mek thu sawilangin, inkalpawhna tha te, zirna lam a hmasawnna leh infiamna lamah hmalakna nasa tak a kalpui mek a nih thu a tarlang bawk a ni.

Khawhai playground Pavilion hi MLA fund cheng nuai 6 sengin July, 2018 a sak tan a ni a, a sak hna hi Khawhai Games & Sport Association ten an thawk a ni.

Khawhai leh Lungtan inkar kawng siam mek hi November ni 27, 2018 a thawh tan a ni a, contractor PC Gupta ten hna hi thawkin km 6.65 a thui leh meter 3 a zau tur a ni a, kawngpui siam nan cheng nuai 435.36 ruahman niin March 2020 chhunga zawh hman tur a duan a ni a, hna hi zaa sawmnga thawk zo tawh anga chhut a ni.