Vawiin khan Lawngtlaia kum 2019 Krismas leh 2020 Kumthar vuakveta boruak muanawm tak a awm theih nana hma lak dan tur hrang hrang ngaihtuahin sawrkar official-te leh tlawmngai pawl hrang hrang ai awhte chu Lawngtlai Bawrhsap Pi Shashanka Ala, IAS hovin Lawngtlai DC Conference Hall-ah an thu khawm.

He hunah hian boruak muanawm tak hnuaia Krismas leh Kumthar hman a nih theih dan tur ngaihtuah ho niin, harsatna hrang hrang thleng thei laka inven dan tur sawi ho a ni a. Hunpui vuakveta boruak muanawm a awm theih nana tlawmngai pawlte hma lak thin dan chhuanawm takte tar lan niin, kumin pawh hian hma la leh tura beisei leh ngen an ni a. Hemi chungchangah hian District Police leh CYLA lam chuan ruahmanna siamin, a tul ang zelin District thuneitute, LADC lam, Police leh tlawmngai pawlte nen inrawn tlanga hma lak ni se, tih a ni.

Krismas leh Kumthar vuakvetah hian Lawngtlai District chhungah chuan ruihtheihthil leh puak thei lam chi hman leh hal khap a ni a. Hmun dang atanga vawk lak luh khapna chu thlah dul a nih rualin, hmun dang atanga vawk la lut turte chuan a hrisel tha leh a him ngei tih finfiah hnu chauh lak luh tur a ni a. Hunpui boruakah mipuite him zawk nan in sak kal lai pawh chawl vek tura thupek chhuah tum niin, damdawi dawrte pawh endik vek tum a ni a. Sualna hrang hrang do tur leh boruak muanawm tak a awm theih nan Police leh tlawmngai pawlte chu ralvengin an awm dawn a, dan bawhchhia an awm chuan dan anga hrem zel an ni ang.