2868/2022-2023
Aizawl the 30th November, 2022 : Vawiin khan Luangpawn khua kum 50 (Golden Jubilee) tlin lawmna leh haw runpui hmanna kal zelah Speaker Pu Lalrinliana Sailo chu khuallian niin a hmanpui a ni.

Khualllian chuan thu sawiin Mizoram buai lai khan khawkhawm vangin khua chhuahsan anih hnuah kum 1972 atanga vawiin thlenga mei mit lova khua an luah chhunzawm zel thei chu lawmawm a ti hle a. Mahni pianna khua theihnghilh loh a pawimawh thu sawiin hawrunpuia lo haw khawmte pawh duhsakna a hlan a ni. Mizoram ruihhloin a tih buai mek laia Luangpawn khuaah drugs zuar an awm miahlo tih khawtlang hruiatuten an lo hrilh chu lawmawm leh entawntlak a tih thu a sawi a, khawtlang hruaitu leh mipuite karah thawhhona tha tak a awm tih a chiang hle a ni a ti. Mizo nun zemawi - tlawmngaihna, aia upa zah leh khawtlang hmangaihna kawngah nasa zawka tan laa hmalam pan zel turin Luangpawn khaw mipuite a chah nghal a ni.

Speaker leh bialtu MLA ni bawk Pu Lalrinliana Sailo chuan tunlaiah social media hmansualnain Mizoram a tuam meka a hriat thu sawiin, mi thatna lai reng reng hmu thei lo, mi sawisel tur zawng, mi an nihna bak baka sawi chhiate an pung nasa hle a, hetiang lakah hian fimkhur a ngai hle ani a ti. Social media hian thalai chauh ni lovin, naupang, nu leh pa, khawtlang leh mitin a chiah hneh tawh hle vangin social media hmannaah fimkhur turin kalkhawmte a chah a ni. Insawichhiatna hian rah tha a chhuah lova, in chawimawi tawn leh infak tawnna hian rah tha a chhuah fo a, mi thatna lai hmu thiamtu nih a pawimawh hle a ni a ti bawk.

Ram leh hnam hmasawnna tur leh hmalam pana a kalzel na turin thiamna mai a tawk lova, Mizoram hian mi tha, mi rinawm, mi dik, ram leh hnam tana mahni inpe tak takte a mamawh tawh takzet thu khuallian chuan a sawi a; ram leh hnam boral lo turin chhungkuaah mitinin bul an tan that leh a ngai a ni a ti. Chhungkuaah zirtirna tha leh dika fate enkawl a nih chuan khawtlang chhenfakawm tak an ni thei dawn a ni a ti.

Bialtu MLA chuan Luangpawn khuaa kum 70 chunglam leh ‘vohbik’ te hnenah thilpek a pe nghal a, khaw inlungrual leh chhenfakawm tak an nih zel theihna turin duhsakna a hlan nghal bawk a ni.

Khual zahawm Pu Benjamin Zalawma, BDO Phullen pawhin thu sawiin Luangpawn khawtlang thawhhona leh inlungrualna chu fakawm tiin Saitual District khaw tam tak zinga khawfai ber pathumna an ni thei chu hmasawna tha tak anih thu sawiin, hun lo kal leh turah pawh hmasawn zawnga khawtlang an kal zel theih nan duhsakna a hlan a ni.

Vawiin Golden Jubilee leh haw runpui puala vantlang inkhawm hi Pu Lalengliana, Vice President, Village Council-in a kaihruia a, Pu Thangchhuana VCP chuan lawmthu sawina neiin vantlang inkhawm hi a khar  a ni.