2867/2022-2023
Aizawl the 30th November 2022 : Tukin khan Aizawl East II Bialtu MLA, Minister of State Pu Robert Romawia Royte chuan New Market sak lai tlawhin Thlai zuartu te harsatna a hmunah a enfiah a. A hmuna hnathawh en honaah hian Aizawl Smart City CEO Er Rothanga, Contractor, Lushai Engineer aiawhte, New Market-a Thlai Zuar Joint Association hruaitute leh Dawrpui khawtlang aiawh te an tel a ni.

Hnathawhna tur Area leh a hungna te en ho a nih hnuah Thlai Zuartu Joint Association ten an ngen angin motor leh mipui kalna zau zawk leh thlai zuartu ten Christmas leh Kumthar mipui mamawh phuhruk theih nan Contractor ten hnathawhna tur Area an hungna chu suan hret se a duh thu Bialtu Minister Pu Robert Romawia Royte chuan a sawi a. Minister leh mipui duhdanin Aizawl Smart City hotute leh Contractor te pawhin a hungna sawn an remti a, zanin hian a hungna chu an lo suan fel tur thu an sawi a ni.

Bialtu Minister Pu Robert Romawia Royte chuan "New Market-a Bazar pui sak tur chu sumdâwngte leh Mizo mipui te tan Mellung pawimawh a ni a. New Market-a sumdâwng zawng zawng te pawhin Dawr hmun tha zawk an neih hun tur thlira Building sak chhûng chu dawhthei taka awm tûrin a ngen a, Contractor te pawh hna tha tak leh a hun taka thawk zo tûrin a chah bawk. Thlai Zuar Joint Association te chuan an harsatna hriaa Bialtu Minister Pu Robert Romawia Royte-in New Market Building sak a hmun ngeia rawn tlawh a, an harsatna a rawn sutkianpui nghal chu lawmawm an tih thu an sawi.

Tukin zing vek khan Aizawl East II bialtu Sports Minister chuan Ist MAP Filed Armed Venga Football Field tihlen leh Phûllem phah hnathawh kal mek a en a. He hunah hian Secretary, Mizoram State Sports Council Pu John Tanpuia, MCS leh Engineer te, Armed Veng Local Council te, Armed Veng Branch YMA hruaitute, Armed Veng Football Club hruaitu te leh Contractor te an tel a ni.

He hunah hian MSSC Secretary Pu John Tanpuia leh Er James Lalramnghaka AE ten Field tihlen a nih dan leh a design dan te, lei min area a nih avanga a Field chhûnga tui lût miah lo tura Drain Board Technology hman a nih dan te an sawi a. Khawtlang hruaitu te'n an hriat fiah duh an zawhte an hrilhfiah bawk a ni.

Sports Minister Pu Robert Romawia Royte chuan "Police Department leh Sports Department ten Inremna fel tak neia Field changtlung tak siam a ni chu lawmawm a tih thu sawiin, khawtlang hruaitute nen enhona remchang an nei chu hlawk an tih thu a sawi a. Tukin zinga Field sak lai enhona Programme hi sorkarin lang tlang veka thil tih a duhna lantîrtu a ni tiin a remchan dang ang zêla hnathawh te lo vil tûrin veng aiawh khawtlang hruaitute a ngen a, Department Engineer te pawh a tawp thlenga hnathawh te vil tura chahin Contractor te pawh a rang thei ang bera hna zo tûrin a hriattir bawk.

Ist MAP Field hi a têt deuh avangin a sir dung tluan feet 413-a sei leh a vang feet 56-a zau chhâwnga sak (Elevated) a ni.