Vawiin khan Pu R. Romawia Speaker, Mizoram Legislative Assembly leh bialtu MLA nibawk chuan MHIP Chaltlang Branch in MHIP Day vawi 39 na lawmna inkhawm Tourist Lodge, Chaltlanga an neih chu a hmanpui.

Inkhawm neih hma hian Tourist Lodge kawtah Speaker hovin Gutkha Product hrang hrang an man khawm sa te chu an halral a ni. Pu Romawia chuan kan ramah rilru lam siam dik (moral reformation) kan mamawh a, hei hi an mawhphurhna pakhatah dah turin MHIP member-te chu a chah a. Vawiina Gutkha product halral a ni hian miin a that loh zia an lo hriat thar leh a duh thu sawiin chhungtinah zirtirna pe uar thar leh turin a chah a. Speaker chuan ram tan thil tha ngaihtuah chhuak turin leh dan lam atanga hmeichhe dinhmun siam that dan turah rilru seng turin a MHIP member kalkhawmte chu a chah bawk.

MHIP Chaltlang Branch in MHIP Day lawmna inkhawm an buatsaihah hian Dr. Thanpuii, Vice President MHIP Gen. Hqrs. chu khual zahawm a ni a. MHIP hi July 6, 1974 khan din niin tunah hian branch 770 a awm a ni.