Vawiin khan Mizo Hmeichhei Insuhkhawm Pawl (MHIP) Day vawi 39-na chu state pumah MHIP Branch hrang hrang ten an hmang a. Parliamentary Secretary leh Bialtu MLA ni bawk Pu Lal Thanzara chuan he Ni hi hmun hnih - Chanmari leh Chanmari West MHIP Branch-ah te Khuallian chan changin a hmanpui a ni.
Vawiin chawhma dar 11:00 khan Chanmari YMA Hall-ah Chanmari MHIP Branch buatsaih MHIP Day lawmnaah a tel hmasa a, hemi hnuah hian chawhnu dar 2:00 khan Chanmari West MHIP Branch-ten MHIP Day lawmna an buatsaih Chanmari ‘W’ Middle English School-ah a hmanpui leh a ni.
Heng hmun hnih-a MHIP Day Vawi 39-na lawmpuina thu sawiin Pu Lal Thanzara chuan mi tana malsawmna nih tum tlat, thil tha tih bak thil dang tulpui neilo tlawmngai pawl hrang hrang - MHIP, YMA, MUP kan neite hi Mizote vanneih bikna leh Chanchintha kan dawn rah kan sengna a ni a, Pathian hnenah MHIP Day-ah hian lawmthu i sawi thar leh ang u, a ti. Chanchintha dawn hmaa Mizo hmeichhiate dinhmun rapthlak takte chu tunah tih boin a lo awm ta mai ni lovin, tunlai khawvel changkang zelah ‘hmeichhe awm nem zawk’ tih tawngkawm te chu a hmanlai thil tawh a ni, a ti. Mizoram-ah phei chuan sorkar office, dawr nghak leh ram pawna sumdawng, chawhmeh zuar, sa zuara sat bawk thlengin mipa aiin hmeichhe hmel hmuh tur a tam zawk tawh a a hriat thu a sawi a. Zirna leh Kohhran lamah pawh hmeichhe dinhmun a sang chho zel a; hengte avang hian hmeichhe chawikanna ‘Women Empowerment’ kan tih hi Mizoramah ngei hian a thleng dik mek a, thil lawmawm tak a ni, a ti.
Khuallian Pu Lal Thanzara chuan MHIP ten khawtlang tana thil tha tam tak an thawkin an buaipui thin chu fakin chung zinga vaihlo atanga siam (ruihhlo) ‘Gutkha’ an do rem te hi a lawmawm hle a ni, a ti. Naupang leh tleirawl tam takin zial zuk ang khawpa thalo a ni tih hre miah lova an ei fo thin ‘Gutkha’ chu a that lohzia Mizoram pumpuiah MHIP ten an tlangaupui leh an do zui hi thil ropui tak a ni, a ti.
Hmeichhia ten nasa taka hma an sawn mek laia an hriat reng tur chu Bible-in hmeichhia siam an nih chhan min zirtir danah “mipa tanpuitu tur” an nihna hre reng turin a chah a, midangte ngei leh nin hlawh lo tur chuan engkimah chintawk neih thiam a tul a ni tiin Khuallian hian MHIP members te a fuih bawk. MHIP chu ram leh hnam tan malsawmna nih tum zel turin vawiin MHIP Day-ah hian member zawng zawngte chibai a buk a, Branch tinte hmasawn zel turin duhsakna a hlan bawk a ni.
Parliamentary Secretary Pu Lal Thanzara chuan MHIP Day pual hian Chanmari West MHIP Building atan cheng nuai 1 a pe a. Bialtu MLA a nih angin Khuallian hian a hmain Chanmari MHIP Recreation Centre sak nan cheng nuai 10 a lo pe tawh bawk a ni. Chanmari MHIP Branch ten kum 2077 atanga an kalpui tawh miharsa zawte tanpuina chi khat ‘Charity Loan’ chu vawiin khan an member 54 hnenah an semchhuak bawk a ni. ‘Charity Loan’ hi Chanmari MHIP member tlawmngaiten sum an thawhkhawm atanga member tanpui ngai te hnenah pekchhuah leh a ni thin a, mi 400 chuang hnenah he tanpuina hi sem a ni tawh nghe nghe a ni.
