MHIP Day vawi 39-na chu nimin khan Home Minister Pu R Lalzirliana'n a bial chhung Ruallung, Rulchawm leh Thingsulthliahah a hmanpui.

Home Minister Pu R Lalzirliana chuan MHIP chu hmeithai leh mi harsa zawkte tan belh tlak, mi rethei leh chhumchhia te tan thlamuanna an ni a, ram leh khawtlang tana an hnathawh chu tlawmngai pawl dang te hmalakna aiin a nep bik lova, a ropuiin chawimawitlak an ni, a ti. Nu te chu inchhungkhur uap lumtu, fa te leh pasal te tana thlamuanna an ni a. Chhungkaw puitling din tura an pawimawhzia hriain kohhran, khawtlang leh MHIP-ah te an inhman rual hian mahni inchhungkhur ngaipawimawh hmasa ber turin a chah a. Pu R Lalzirliana chuan MHIP chu lungrual taka Mizo hmeichhiate insuihkhawmna pawl, hmeichhiate zahawmna chawinungtu niin mahni mimal hamthatna chauh ngaihtuah lova  midangte tana malsawmna ni chhunzawm zel turin a chah a ni. Pu R Lalzirliana chuan hmeichhiate chu inchhung enkawltu ber an nih avangin anmahni leh an in chhung a thianghlim phawt chuan khawtlang a thianghlim thin tiin kan khawtlang a lo thianghlim zawk theih nan mahni inchhungkhur atanga bul tan turin MHIP Day hmangtute a chah a ni. 

Home Minister leh amah tawiawmtu a nupui Pi Lalthangmawii te hian Ruallung, Rulchawm leh Thingsulthliahah te hian MHIP Day lawmnaa lo kal, kum lama upa mi engemawzat hnenah chawimawina thilpek  an pek bakah MHIP Day lawmna senso phuhruk nan cheng 5000 theuh heng khuaah te hian an sem a ni. 

Thingsulthliah khuaah hian MHIP Office thar chu Home Minister Pu R Lalzirliana hian a hawng nghal a, he office sak nan hian sum cheng nuai 4 a lo pe tawh a ni.