Vawiin chawhnu khan Lily Veng Cultural & Drama Club ten naupang hnam lam zir kharna inkhawm Bawngkawn YMA Hall ah an nei a. Mizoram Legislative Assembly Speaker Pu R Romawia chuan khuallian niin he hun hi a hmanpui.
Pu R Romawia chuan mahni hnam nunphung ngaihsan leh chawisan hi hnam ropui zia a ni a, mi hnam tihdan ngaihsan leh entawn chin erawh chu hnam boral mek zia a ni, a ti. Lily Veng Cultural & Drama Club ten Mizo hnamzia chawi nun zel nan naupang sikul chawlh hmang tangkaia hnam lam zirtir nachang an hria chu lawmawm a tih thu sawiin phur leh hlim taka mahni hnamzia hnamdang te it thama pholan a tul a ni, a ti. Mahni hnamzia ngaisang tura thalaite kan inzirtir mek lai hian hnam zahawm ni tur erawh chuan intodelh a tul a, ram leilung hausakna haichhuaka taima taka hnathawh a tul tih sawiin pawn lam atanga pur chaw reng, hnam dang te tel lova khawsa theilo kan nih chuan hnam zahawm leh huaisen a nih theihloh, Speaker chuan a ti.
He hun hmanpuitu Art and Culture Director Pu Ngurbiaka pawhin thusawiin Lily Veng Cultural & Drama Club hmalakna fakawm a tih thu leh nu leh pa te pawhin mahni insengso a hnam lam zir tura an fate an kaltir chu lawmawm a tih thu a sawi.
Naupang kum 7 leh 14 inkar tana buatsaih naupang hnam lam zirnaah hian naupang 70 vel an tel a, zirtirtu pahnihin an zirtir a ni. Lily Veng Cultural & Drama Club hi 1999 a din niin ram chhung hmun hrang hrangah te zin chhuakin hnam lam an entir thin a. Song &Drama Division, Ministry of Information and Broadcasting hnuaiah Mizoram atanga Grade A artiste awm chhun an ni a, Indian Council for Cultural Relation, Ministry of External Affairs hnuaia Mizoram atanga Empanel Artiste awm chhun an ni bawk.
