2079/2026-2027 

Aizawl, the 5th September, 2026 : Assembly Speaker Pu Lalbiakzama, Chalfilh bialtu MLA ni bawk chuan vawiin khan Sesawng Volleyball Court thar a hawng.

Hemi puala hun hmanah Speaker Pu Lalbiakzama chuan Sesawng volleyball court thar chu thalai ten nun hrisel zawk an neih theihna tur ni se a duh thu a sawi a. A hnain a ken tel baka la tihphuisui tul hrang hrang - a hungna siam, light system leh a kotlang tinghettu tur retaining wall-te pawh ngaihtuah zui zel a tum thu a sawi a ni.

Vawiina hawn tak Sesawng volleyball court hmun hi VC te pek niin, Sawrkar puihnain volleyball court puitling ni tura tehfung angte tlin turin siamthat leh tihphuisui ngaite thawh a ni a. Tluang taka zawh fel a nih hnuah leiminin gallery a hnawl chhiat avangin a bul atanga thar thawh leh a ni. Sesawng volleyball court-ah hian gallery chung nei, infiammite inthlakna In bakah substitute leh team management-te thutna bench-te a awm a ni.

He hun hi Pu B. Thanglawra, VCP, Sesawng VC - II chuan kaihruaiin GSA atangin thusawi ngaihthlak a ni a. Sesawng Joint VC Chairman-in lawmthu sawiin hun hman a khar a ni.

Vawiin vek khan Speaker Pu Lalbiakzama chuan Sesawng khuaa leiminin a tihchhiat Pu Laltanpuia (L) leh Pu Khawpuithara te In pawh a hmunah tlawhin inchung tur rangva a pe nghal bawk.