2116/2025-2026

Champhai, dated 31st October 2025: Mizoram Legislative Assembly Speaker Pu Lalbiakzama chuan vawiin khan Dilkawn Community Hall-ah Kelkang Joint YMA leh Kelkang Khawchhuak buatsaih Vangpui Intawhkhawm Vawi 2-na khuallian niin a hmanpui a, Champhai South bialtu MLA Lt. Col. Clement Lalhmingthanga chuan khual zahawm niin a hmanpui bawk a ni.

Khuallian Pu Lalbiakzama chuan thu sawiin he hun ropui taka buatsaihtute'n an sawm avangin lawmthu a sawi a, he Vangpui Intawhkhawm hi Mizo culture tunnunna tha tak niin a hriat thu a sawi. Pi leh pute nunphung phochhuah a pawimawh hle thu a sawi a, heng phochhuak tur hian khawvel hmasawnna hrang hrang inchim ral tir lovin hman tangkai zawk a tul a ni tih a sawi. Kelkang khaw thalaite inelna khawvel sang takah hian Kelkang hming chawikangtu ni turin a chah a, lehkha zirna leh hna zawnnaah theihtawp chah turin a fuih. Hun hlimawm tak hmang turin duhsakna a hlan a, hming tha tak chher chhuak turin duhsakna a hlan bawk a ni.

Khual zahawm Lt. Col. Clement Lalhmingthanga chuan thu sawiin bialtu a nihna anga a tel thei hi a lawm thu a sawi a, thalaite taimakna leh tumruhna nena hna um zel turin a chah a, a bikin ram tana rawngbawlna tha tak Territorial Army hnuaia sipai nih theihnaa tam thei ang ber tling turin a chah a ni.

Vangpui Intawhkhawm Vawi 2-na hi nizan khan variety programme hmangin tan tawh a ni a, tukin dar 10 khan chhunzawm niin he hunah hian Kelkang Joint YMA hnen atangin thupuan leh inlawmna thusawi ngaihthlak a ni a, intihhlimna hun hrang hrang hman a ni bawk. Chawhnu dar 1 khan Dilkawn Field-ah outdoor programme hman niin insuknawr, inhruipawh leh intihhlimna hrang hrang huaihawt a ni a, zanah Zo Zan hman niin malzai te, live band te leh thusawi te ngaihthlak a ni.