Nimin chawhnu khan Town Hall tual, Khawhaiah Speaker Pu Lalrinliana Sailo chuan 19th Tuipui-Tuichangral Games hawnna hun a hmanpui a, khaw 15 atanga infiammite he hunah hian an tel a ni.

Speaker Pu Lalrinliana Sailo chuan Tuipui-Tuichangral Games chu Khawhai khaw tlangdung a khaw hrang hrangte inpawhna leh inlungrualna atan a hmanraw tangkai tak a nih thu sawiin infiammite tan a inphochhuahna khelmual tha tak a nih thu a sawi bawk. Speaker chuan Mizoram sawrkarin nasa taka hriselna leh infiamna kawnga thalaite tan hma a lak thu sawiin mahni phak tawk a infiamna hrang hranga tel chu hriselna atana thil tangkai a nih thu leh zuk leh hmuam, ruihtheithil a fihlim tum a, infiamna uar deuh deuh turin a chah bawk a ni. Pu Lalrinliana chuan Tuipui-Tuichangral Games chu Khawhai tlangdung a khua te inlungrualna tha zawk thlentu ni turin duhsakna a hlan a he tlangdung a infiammite tan malsawmna leh hmasawnna thlentu a nih ngei a beisei thu a sawi bawk. Speaker chuan Tuichang Constituency in bialtu MLA tha tak, Deputy Chief minister ni bawk an nei chu an nihlawh a tih thu a sawi a, Deputy Chief minister hmalakna zarah he tlungdung hian hmasawnna kawng hrang hranga a hmuh mek thu a sawi bawk a ni.

Tuipui-Tuichangral Games hawnna ah hian Pu K Rodawla, VCP in lawmthu sawina hun a hmang a Pu Hauhnunpuia, General Secretary, Tuipui-Tuichangral Games & Sport Association in report pein zaithiam ten hun an hmang bawk a ni.

Tuipui-Tuichangral Games hi November ni 25 atanga ni 30 thleng neih a ni dawn a, khaw 15 atanga infiammi 300 velin infiamna chi hrang 13 ah inelna an nei dawn a ni.