Nihnih awh tur Mizoram State Child Protection Society leh Eternity Partneship LLP te tangkawp buatsaih  “Youth Empowerment Summit 2019”  chu vawiin khan Chanmari YMA hall ah hman tan a ni a, thupui atan What’s Next tih hman a ni a. Aizawl khawchhunga High school zirlai leh Higher Secondary School zirlai thahnem tak an kal khawm a ni.

Vawiin a summit hawnna inkhawmah hian Pi Amy Lalrinpuii, Programme Manager, Mizoram Child Protection Society chuan kal khawmte lawmna thu a sawi a. Pi Zoramthangi Hauhnar, Secretary, Social Welfare Department chuan Summit hi hawngin Youth Empowerment Summit chu kum 2017 atangin thupui hrang hrang hmanga kum tin hman a nih thu a sawi a, summit in a tum ber chu Zirlaite an zirna kalkawng tur kawhhmuh leh eizawnna tur kawng bik nei a kaihhruai a nih thu sawiin, sawrkar hna chi hrang hrang  inkawhhmuhna a nih mai bakah zirlaite chu mahni kut ke a ding thei tura infuihna leh inchochhuahna hun a nih thu a sawi bawk. Hei bakah hian child proctection  chungchang sawiin, naupangte chu humsual an dai hnu leh harsatna an tawh hnu chauha buaipui lovin, humsual an dai hma leh vanduaina an tawh hma a, venhim leh  buaipui a tul thu a sawi bawk a ni.

He summit hi session hrang hrangah then a  ni a,   session tinah hian mizo zinga mithiam leh a ber kaite hnen atangin presentation tha tak tak ngaihthlak leh thlir ho a ni a, chumai bakah zirlaite nen inkawmhona hun hmangin zawhna leh chhanna hun siam a ni bawk. Presentation ah hian career guidance chungchang ah naupangte zirtirna pek niin sawrkar hna tha tak tak thawk thei tura tih ngai leh kalkawng te, entrepreneurship lam te bakah awareness campaign hunte hman a ni  bawk. Session hrang hrangah hian  naupangte hnenah  zawhna siam a ni a,  a chhang tha te hnenah lawmman pek a ni bawk a ni.

He summit hi naupang ten an hlutin an hlawkpui hle a, hetiang bawk hian naktuk lamah pawh hun hman leh tura ruahman a ni.