Mizoram Police Raising Day, 2020 lawmna peng hrang hrang zinga Cultural Programme chu Vanapa Hall-ah vawiin chawhnu khan hman a ni a, Mizoram Assembly House Speaker Pu Lalrinliana Sailo chu khuallian niin, he hun hi a hawng a ni.

Khuallian Pu Lalrinliana Sailo chuan thu sawiin, rinawmna leh huaisenna Mizoram Police ten an neih chu ram tan vawng nung reng se, thlahtute atanga hnam tlawmngai leh midangte tana nun pawh hlan ngam thin tu an ni tih inhriain, ram leh hnam thlamuantu an ni tih chu theihnghilh ngailo se, tiin a sawi a. Rampawn duty naah te, Election duty-ah te, tlawmngai taka an duty thin chu fakawm a ti a, tunlai khawvel changkang zelah Information inpek chhuah chhungchangah te leh Intelligent Network-ah tan lak a ngai leh zual a ni, a ti a. Border Issue te, Illegal Immigrant, Infiltration Issue hrang hrangah Police ten hna nasa takin an thawk a, Human Trafficking chungchangah phei chan Mizoram Police te hnathawh hi fak awm a tih thu a sawi bawk a ni. Khuallian Pu Lalrinliana Sailo chuan Cultural Programme chu hun lokal zela Mizoram Police te inlungrualna thlentu a nih theihnan duhsakna a hlan a ni.

Cultural Programme hi Pu Lalhuliana Fanai, DIG (Armed/ER) leh Working Chairman, Mizoram Police Raising Day-2020 Celebration Committee nibawk chuan a kaihruai a, Special Item hrang hrang neih a ni a, chung zingah chuan 3rd Bn. MAP ten Chawnglaizawn leh 5th IR Bn. ten Khuallam an lam a, hei bakah hian Mizoram Police Raising Day 2020- denchhena Singing Competition-a lawmman la tute pawh an zai bawk a. Cultural Programme hman a nih rual hian Vanapa Hall Reception-ah Weapon hrang hrang a duh apiang en a tan phochhuah a ni a. Pu C.Lalnunmawia, AIG (P&L), PHQ chuan lawm thu sawiin he hun hi a khar a ni.