Mizoram State Museum, Art & Culture Department buatsaih Museum Week chu vawiin January 20, 2020 (Thawhtanni) atang hian hman tan a ni a, January 24, 2020 (Zirtawpni) ah khar a ni ang.

Museum Week chhung hian nitin chawhma dar 10:00 atanga tlai dar 3:30 thleng mipui tan Museum chu en man awm lovin an hawng dawn a, mi zawng zawng Museum en turin an sawm. Museum Week hawnna inkhawm hi vawiin khan Mizoram State Museum-ah hman a ni a, Khuallian Pu R. Hmingthanzuala, Director Art & Culture Department chuan thusawiin – Mizo hnam hrang hrangte in unauna vawng thar leh turin kan in unauna ziarang vawng nung rengtu Museum hi kan hlut lehzual a tul a; Mizoten kan ram leh hnam hmasawnna tura ke kan pen lai hian kan nihna min hriatchian tirtu Museum hi ngaihlu zel ang u – tiin Museum Week hi a hawng a ni. Tin, Museum Week hmang tur hian zirna-in hrang hrang 11-ten an en hun bik tur siamin sawm bik an ni.

Mizoram State Museum hian 2018-2019 sawrkar kum chhung khan tlawhtu mi 13157 an nei a, museum en man atangin sawrkarah Rs. 41430 .00 an chhunglut a, museum tlawh tu zinga mi 33 te hi Foreigner an ni a, mi 14 te hi VIP leh VVIP an ni bawk. .

Mizoram State Museum-ah hian Gallery 6 (paruk) a awm a, Mizoram State Museum hian Museum objects 2679 lai a la khawm tawh a, heng zinga 729 te hi show case chi hrang hrang 109-ah pho chhuah a ni a. A bak zawng hi reserve collection-ah dah a ni. Tribal Museum, Ranchi-ah te, Bhopal Museum-ah te, Silpigram Museum, Guwahati- ah te, Jawaharlal Nehru Museum, Itanagar-ah te Mizo hnam hmel lanna Museum Objects eng emaw zat thawn (Donate) a ni tawh a.

Ni bika a thlawna Museum entheih ni tih lohah chuan Museum tlawhtu an tam lem lo va. Ni bik, a thlawna Museum en theih hunah entu an tam em em thin a. Chung ni te chu ‘Museum Week’ leh ‘International Museum Day’ te an ni. Entry fee hi puitling pakhat tan Rs.20 /- leh naupang pakhat tan Rs.10 /- a ni a. School naupang zirtirtute hruaia educational trip-a lo kalte chu 50 % concession pek an ni a. Kum upa, kum 65 chin chung lam te chu en man chawitir an ni lo bawk.

Museum hi March - September thla inkar chhung zawng chu dar 10:00 AM - 4:00 PM -ah hawn thin a ni a, October - February chhung chu dar 10:00 AM - 3:30 PM-ah hawn a ni thung. Chawlhkar tin thawhtan ni apiang hian chawhma lamah thawktuten Gallery tihfaina hun an hmang thin a, chuvangin thawhtanni-ah chuan Dar 1:00 PM - ah Museum hi hawn thin a ni a. Inrinni hian dar 10:00 AM - 2:00 PM chhung Museum hawn thin a ni a. Sunday leh Sawrkar Holiday-ah te chuan Museum khar thin a ni.